夜光鬼魅巡遊: 詭秘艷麗的萬聖節派對

聖誕節都就到啦喎，做咩又講返萬聖節嘅野？之前就同大家講過，其實我仲有幾篇有關 迪士尼黑色世界2013 嘅文章未出，但係我又係拖咗勁耐先至開始寫...  而第一篇相關文章就係呢篇 夜光鬼魅巡遊 特集！

呢個巡遊不經不覺已經陪伴我地渡過咗好多年嘅萬聖節，不過聽聞2013年會係佢最後一次出場，因為由下年開始佢就要讓路俾全新嘅夜間巡遊！既然要同佢講再見，所以我響今年都特別落力去影相！而家，就同大家分享一下我嘅相片特集啦！

「歡迎你！萬聖節快樂！」南瓜王阿積 坐響巨型南瓜帶著氣勢出場，邀請所有人加入萬聖節派對！

南瓜嘅背後係一大堆樹籐，有兩位怪誕舞者響樹籐之中起舞！

莎莉 一直都深愛著 阿積，佢緊緊跟隨著自己嘅愛人，渴望可以慢慢親近佢！

咦，有更多嘅怪誕舞者響南瓜花車嘅後面跳緊舞呢！

鬼才博士 Finkelstein 帶齊整副實驗室裝備，製作一系列萬聖節道具！

緊隨其後嘅係魔鬼舞者！見到佢地頭頂上嘅魔角，會唔會係惡夢嘅開始？

果然，更可怕嘅事情陸續降臨！一班 迪士尼大壞蛋 現身啦！

黑巫婆、庫伊拉、鐵勾船長、凱帝斯、紅心女王 紛紛出場，展現出邪惡嘅樣子！

跟住就到我最愛嘅花車啦！就係鬼貴族舞會花車！

我覺得呢班鬼貴族嘅造型好特別，華麗得黎又帶點兒詭秘！

除咗有幾對鬼貴族響地上起舞，花車上都有其他鬼貴族進行一場浪漫而幽怨嘅舞會！

佢地周不時都會依靠響欄杆或者柱上面，我覺得幾搞笑，哈哈！

好啦，下一批就輪到火焰舞者登場！你感受到熾熱嘅氣氛嗎？

熔岩花車上面，幾位火焰舞者做出一連串高難度翻滾動作！仲有熔岩怪不斷噴煙呢！

接近巡遊尾聲，香港迪士尼樂園樂團 都出黎助慶一下，奏出神秘樂章！

壓軸出場嘅係海盜舞者、海盜船造型花車！「伸直拳頭，然後前面交叉！」大家一齊做動作啦！

八位 米奇家族 成員穿上特別設計嘅萬聖節服飾，企響花車上面同大家打招呼！

船長 米奇 帶著自己嘅女朋友，再帶領大家出海去進行探險！出發啦！

同場加映：消失咗嘅詭異城堡花車以及南瓜舞者...  我本身都幾鍾意呢班南瓜人架，佢地嘅造型好得意，今年第一晚睇 夜光鬼魅巡遊 嗰陣發現冇咗佢地，都覺得有啲可惜...

以上就講完整個 夜光鬼魅巡遊 嘅巡遊隊伍，但講到呢個巡遊最迷人嘅地方，必然就係夜光環節！整個巡遊期間會有幾次短暫停頓，現場嘅燈光完全熄滅，一眾舞者響漆黑之中發出瑩光效果，再配合緊湊嘅音樂跳舞，令全場氣氛進入高潮！我覺得呢個環節係整個巡遊最壯麗嘅一刻！

呢個 夜光鬼魅巡遊 相片特集結束啦！其實我自己係唔太鍾意用閃光燈影相嘅，因為我覺得會令相片失去咗現場原有嘅燈光效果，但係呢個習慣就令到有部份相片比較朦糊，希望大家見諒...

夜光鬼魅巡遊 作為 迪士尼黑色世界 多年黎嘅焦點項目，雖然已經冇機會再睇，但係我會永遠記住呢個咁特別嘅巡遊！我亦相信，呢個巡遊將會永遠存在響Fans們嘅心中！