兩隻小熊, Mont擁有鋼牙齒, Blanc擁有大鼻子!

前日嗰篇文章就講咗 東京迪士尼渡假區「IKSPIARI」商城以及裡面嘅 迪士尼商店，並且提到「UniBEARsity 小熊大學」呢個原創嘅商品系列；今日，就等我向大家介紹呢個系列當中嘅兩位小熊成員，Mont、Blanc！

購買呢兩隻小熊毛公仔，都分別會附有一個「UniBEARsity」招牌，證明佢地係 小熊大學 嘅其中一份子；另外，佢地嘅腳上都繡有標誌，而背後就釘有標籤。

標籤嘅其中一面寫有「Disney UniBEARsity」字樣，再睇睇另一面，係兩隻小熊嘅「A+」成績同埋教授簽署。Ludwig Von Drake？邊個黎架？其實響店內佢都有出現過，貨架左上角嗰隻鴨就係佢啦！呢位 唐老鴨 嘅叔叔去咗 小熊大學 做教授！

言歸正轉，講返兩隻熊仔先！先前講過，小熊大學 呢個系列最大嘅特式就係每隻小熊都係以一位 迪士尼朋友 為設計藍本？咁 Mont、Blanc 又代表咗邊個 迪士尼朋友 呢？先睇睇毛髮顏色，Mont 係深啡色，Blanc 係淺啡色。

再睇下眼耳口鼻有咩特別啦：Mont 擁有鋼牙齒，Blanc 擁有大鼻子。大家估到未呢？其中我咁樣寫，答案都經已呼之欲出，哈哈！正確答案：Mont 代表 鋼牙奇奇，Blanc 代表 大鼻帝帝！

呢兩隻小熊原來係 Chip、Dale 嘅化身，佢地嘅背部都有深色條紋以及白色尾巴，似足花栗鼠！大家覺唔覺得佢地好可愛呢？明明係熊仔，但係就有花栗鼠嘅特徵！

就連佢地頸上嘅領帶都有橡果圖案！我返到屋企先至知道條領帶係可以拆出黎，戴住領帶得意啲，抑或唔戴得意啲呢？我就覺得戴咗領帶感覺上好斯文！

我發現自己對熊仔真係情有獨鍾...  Duffy迪士尼小熊、Pooh小熊維尼，而家再加埋 小熊大學 Mont、Blanc！究竟點解我會咁鍾意熊仔，我自己都唔知道...