東京迪士尼之旅2014: 最後倒數十五日!

由半年前決定2014年會再去 東京迪士尼渡假區，原來話咁快已經黎到最後倒數階段！十五日後，我就會再次出發開展新一次春日巡航！同上年一樣，響呢十五日裡面，每日都會有一張倒數圖片，展示今次旅程嘅焦點項目！

倒數圖片會同時刊登於 Tho's Dreams 網誌以及專頁 - 響網誌介面嘅右手邊，新增咗一個新嘅 東京迪士尼之旅2014 專欄，每晚午夜00:00會自動更新；至於專頁嗰邊，我就會響每日嘅午間時份上載當日嘅倒數圖片。

東京迪士尼之旅2013 嘅時候，配合 東京迪士尼渡假區 三十週年慶典以及旅程途中所遊覽嘅旅程景點，我就將旅程主題定為「幸福童話之旅」；今年我都會有一個旅程主題，就係...「探索魔幻奇妙」！點解會用呢個主題呢？稍後，各篇旅程前傳文章將會陸陸續續登場，同大家分享 東京迪士尼之旅2014 嘅特別之處！請各位繼續留意，魔幻奇妙快將在此散播！