迷離莊園 開幕一週年!

2014年5月17日，迷離莊園 話咁快就踏入開幕一週年！大家仲記得當初不斷期待嘅心情嗎？我都知道響過去一年我已經有幾次係用咗呢個新園區做網誌主題，但黎到一週年又冇理由唔慶祝掛？希望大家唔會覺得厭悶，哈哈！

濃濃嘅雲霧包圍著 迷離大宅，再加上暗紫色燈光，為佢增添唔少撲朔迷離嘅感覺！網誌兩旁有好多 阿拔 頭型圖案，一年經已過去，你有冇愛上呢隻頑皮而活潑可愛嘅小馬騮呢？

我響呢一年間黎過幾多次 迷離莊園？就連我自己都記唔清，不過每次入園遊玩，就算唔入去 迷離大宅，我都會非常堅持一定要經過呢個莊園，感受呢到獨有嘅氣息！總而言之，迷離莊園，多謝你為我地帶黎好多非一般嘅奇幻歷程！