香港迪士尼樂園「迪士尼光影滙」快將登場!

話咁快，距離 香港迪士尼樂園 九週年嘅大日子只係剩返兩個月；講到今年最矚目嘅生日禮物，一定係全新夜間巡遊「迪士尼光影滙 Disney Paint The Night Parade」！早前，園方向各個本地傳媒公佈相關消息，表示呢個新項目將會響十月隆重登場，日子已經慢慢變得愈黎愈近啦！

各位樂園Fans們都一定知道，其實 迪士尼光影滙 並唔係 香港迪士尼樂園 首個夜間巡遊；響之前幾年嘅 迪士尼黑色世界 活動，夜晚都會上演 夜光鬼魅巡遊，一個以萬聖節作為主題嘅夜間巡遊，所以大家對夜間巡遊呢款表演項目應該都唔會感到陌生。

但講到 迪士尼光影滙 最唔同嘅特點，就係佢係一個常設嘅夜間巡遊；即係響首演之後會持續每晚演出，唔再只係局限響萬聖節活動期間。過往，世界各地 迪士尼主題公園 都引入過不同嘅常設夜間巡遊，不過現時就只係得返 東京迪士尼樂園、迪士尼世界夢幻王國 設有已經沿用多年嘅夜間巡遊。

香港迪士尼樂園 迪士尼光影滙 作為多年來首個全新設計嘅 迪士尼 常設夜間巡遊，相信一定可以為所有人帶黎嶄新嘅感覺！根據園方資料，迪士尼光影滙 除咗有 奇妙仙子、小魚仙 等等嘅 迪士尼朋友 之外，仲有 麥坤、毛毛、大眼仔 首度現身於香港嘅巡遊表演，對你黎講又有冇新鮮感呢？

雖然話就話十月登場，但睇返過去幾年嘅 迪士尼黑色世界，因為樂園響九月有好多私人包場，所以活動順延至十月先至正式開始，並且響九月上旬舉行 奇妙處處通 會員試玩日。唔知，迪士尼光影滙 響黎緊嘅九月會唔會有預演呢？好期待啊！就等我地一齊手執魔法筆，響黑夜中畫出光影啦！