其實 阿積 Jack 都有不少粉絲，而我都係其中一個！每次睇夜光鬼魅巡遊，見到佢帶頭行出黎，都真係幾興奮架！當佢正式出到黎，燈光亦會慢慢亮起！「萬聖節快樂！」南瓜王為大家送上祝賀。響花車後面，就有幾位南瓜人守護著 阿積！佢地一齊響到跳舞慶祝！
第二架花車就係 怪誕博士 Doctor Finklestein 嘅實驗室花車啦！響花車嘅前面，莎莉 Sally 正跟隨愛人 阿積 Jack，而博士就在後面想要叫停 莎莉，一直呼喊著：「莎莉，唔好亂咁走，你係我嘅心血結晶黎架！」而博士嘅實驗室入面亦佈滿不同古靈精怪既東西... 花車後面就係一班怪誕舞者，佢地跳舞都好好睇架！
夜光鬼魅巡遊 嘅第三架花車，就係 黑巫婆 花車啦！花車以城堡作為主題，城牆上都佈滿雜草，突出詭異嘅感覺！黑巫婆就高高在上，發出令人毛骨悚然嘅奸笑聲... 花車上亦有一口井，唔知入面係咩黎嘅呢？花車之後亦有一班舞者，今次係魔鬼使者！每位魔鬼使者嘅造型都好有邪惡既感覺！
黎到第四輛花車，緊接 黑巫婆花車 嘅，就係另一班 迪士尼大壞蛋 所乘坐嘅花車！花車最前端有一條黑暗魔龍，佢仲識噴煙架！一班大壞蛋就企響花車上面同大家見面，我影到嘅有以下三位... 首先係來自 愛麗絲夢遊仙境 既 紅心皇后！之後就係 小飛俠 嘅死敵，鐵勾船長！最後就係 Hades，來自 大力士 嘅黑暗之神！花車上亦有 毒蛇、魔鬼 等黑暗裝飾！車尾有一條鱷魚，雖然唔係幾有黑暗感覺，不過都幾得意。
黎到第五架花車，亦都係我最鍾意既一架！因為我覺得無論服飾、排舞、花車佈置都非常華麗，好好睇！花車前面，已經有一對對鬼貴族，跟隨琴聲起舞！佢地跳嘅舞真係好特別，除咗華麗優雅之外，亦不失鬼魅氣氛！響花車上亦有鬼貴族，在吊燈之下跳舞，享受屬於佢地嘅舞會。嘩！其中一位鬼貴族撲出黎，唔通想邀請大家加入？
後面嘅花車亦都係我比較鍾意嘅一架，就係 火焰花車 啦！響花車前亦有一班火焰舞者載歌載舞，佢地一路跳，就好似真正既火花燃燒一樣，璀璨奪目！呢架花車，用咗岩石做主題，同火焰好襯架！而響花車上，火焰舞者做出一系列嘅高難度動作！花車後面，就有樂園樂團，即場配合背景音樂演奏！
黎到最後一架花車啦，就係 Mickey 嘅魔盜船花車啦！花車前面有海盜舞者，上面就載住唔同嘅 迪士尼朋友，同大家一齊跳跳舞！花車設計成好似一架船咁，更加可以上下擺動，好似真係響海上航行咁！上面嘅都係一啲非常熟悉嘅 米奇家族 迪士尼朋友，有 Donald、Daisy、Chip & Dale、Pluto、Goofy... 當然都有 Mickey 同埋 Minnie 啦！Minnie 更加會帶領大家跳舞！響瑩光嘅時候，船尾窗面更加會出現鬼魂架！
終於去到巡遊末端，有另一班鬼鬼同大家一齊跟住巡遊隊伍前進！見到佢地，亦代表 夜光鬼魅巡遊 正式結束，我地下次再見啦！
沒有留言:
張貼留言