小飛象Dumbo - 向天空飛翔!

其實，有好多迪士尼朋友我都幾鍾意；不過呢排就發現自己特別喜愛了一位迪士尼朋友，就係 小飛象Dumbo！我都唔太清楚點解自己突然間會鍾意左佢，我諗係因為佢個樣夠得意，同埋我自己都覺得翱翔天際係一件幾奇妙既事，可能就係咁就鍾意左佢...

其實響 迪士尼樂園 入面，要見到 Dumbo，並唔係一件難事。因為 小飛象 全天候都會響 幻想世界 入面飛翔！( 事實上，我只係坐過 小飛象 1-2次，因為通常都要排好耐隊！)

當然，我地亦可以響 迪士尼飛天巡遊 當中，巡遊隊伍既最頭見到 Dumbo 既蹤影！

我本身唔多清楚 小飛象 既背景故事，亦冇睇過套戲...  頭先響網上睇左一陣，認識一下呢位迪士尼故事人物。而家簡略知道 小飛象 俾人拎左去馬戲團入面，不過就因為擁有一雙大耳朵而俾馬戲團既其他人取笑。之後，響朋友既鼓勵下，忘記他人既取笑，鼓起勇氣，終於發掘到自己可以用耳朵飛行既潛能，成功響馬戲團入面表演！

呢套動畫係響1941年上映，果然係迪士尼經典！有機會的話都想睇下呢套動畫，走進 小飛象 世界！