響諗唔到寫咩好嘅情況底下，我最後決定同大家分享一下我最愛嘅十位 迪士尼朋友！唔知你地會唔會有啲都同我一樣係鍾意嗰位 迪士尼朋友 嘅呢？
1) Duffy迪士尼小熊 - Duffy the Disney Bear
Duffy，響2010年聖誕節嘅時候，香港迪士尼樂園推出了呢隻小熊。其實我都唔知點解，我由細細個開始就好鍾意小熊，可能貪佢地好攬！Duffy係一隻會帶來愛同埋歡欣嘅小熊，佢一推出就令我愛上佢啦！
2) 小熊維尼 - Winnie the Pooh
Pooh同係一隻好得意嘅熊仔，自然就能夠令我鍾意佢。再者，佢傻下傻下咁，每論如何都要食蜜糖，永不放棄！我又係同佢一樣，好鍾意食蜜糖。同埋佢呢種永不放棄嘅性格，令我不得不佩服！
3) 小飛象 - Dumbo
佢擁有一雙大耳朵，能夠響天空中飛翔。其實我好嚮往響天上面自由自在咁飛嘅感覺，一定會好舒服。佢背後嘅故事，同樣係排除萬難，向目標進發，好值得我去學習。
4) 零零 - Zero
一隻響 怪誕城之夜 電影入面出現嘅狗仔。可能係貪佢夠盞鬼啦，飄下飄下咁！值得一提嘅，佢個鼻係一個識發光嘅南瓜黎，好得意！
5) 阿積 - Jack
南瓜王阿積 係怪誕城入面嘅明星人物，負責構思每年萬聖節嘅慶祝活動。好多人都好鍾意佢，而我都係因為佢夠搞鬼而鍾意佢。身為骷髏骨頭人嘅佢仲成日抆自己個頭出黎，好搞笑！
6) 豆豆 - Peas in a Pod
響 反斗奇兵3 入面出現嘅玩具人物。由三粒小豆組成，三兄弟互相扶持。唔知點解總係覺得佢地好得意，所以就鍾意咗佢地啦！
7) 小飛俠 - Peter Pan
鍾意佢嘅原因，主要都係同 小飛象 一樣。再加上，佢飛嘅時候個姿勢真係好型；雙腳合實，展開雙手。能夠自由飛翔，更加可以周圍探險，羨慕啊！
8) 米奇 - Mickey
響 迪士尼樂園 入面，見得最多嘅，就一定係佢啦！成日見，好難會唔鍾意佢嘅... 不過我最愛嘅始終都係魔法師造型，尤其係頂帽，真係好靚！
9) 勞蘇 - Lotso
都係響 反斗奇兵3 出現嘅玩具角色。我真係好鍾意熊仔，所以都有少少鍾意 勞蘇 嘅。但係點解排名咁低，我諗係因為佢太肥... 同埋響戲入面係奸角吧...
10) 史迪仔 - Stitch
我以前曾經都好鍾意佢架，又係因為夠搞鬼嘛！不過可能佢真係太百厭啦，令我慢慢冇咁鍾意... 所以而家只係僅僅上榜咋！如果佢冇咁頑皮的話都唔錯嘅。
好啦，我就分享完我最鍾意嘅十位 迪士尼朋友 啦！咁你地又鍾意邊啲 迪士尼朋友 呢？
沒有留言:
張貼留言