東京迪士尼之旅2012 - 旅程日誌
Day 5 日期:6月11日 (星期一)、地點:東京迪士尼渡假區
響東京車站食完晚飯,就搭火車返舞浜站,東京迪士尼渡假區 嘅所在地。
一出火車,響站內已經可以見到好多廣告同海報。
東京迪士尼海洋 Duffy 海報啊!見到呢張海報好開心!
出站後,就去咗渡假區內嘅購物商場,因為嗰到有一間 迪士尼商店。
迪士尼商店 賣嘅,同兩個主題樂園入面賣嘅係完全唔同嘅,所以點都要去睇一睇。之前分享過我買咗嘅 訓覺Pooh 同 豆豆 公仔。
迪士尼商店 另外推出咗一個叫 UniBearSity 嘅熊仔商品系列;相信係見到 Duffy 嘅成功先至推出。
但係我就唔係太有興趣啦,因為覺得唔係太得意... 不過,商店入面都有好大個專區係放呢一個系列嘅商品。
買完野,就搭 迪士尼渡假區線 單軌鐵路 返酒店啦!
站入面都係充滿迪士尼色彩嘅佈置。
我地上車個站叫做 渡假區入口站。
有單軌列車到站啦!
車入面嘅佈置當然都係充滿迪士尼色彩啦。其中,啲扶手同香港 迪士尼線 嗰啲好似樣。
因為拎住一大袋野,所以直接返去酒店房間啦。房入面有啲 迪士尼渡假區 嘅宣傳紙牌同單張。
電視亦有一個台係特別介紹 迪士尼渡假區 嘅。
聽朝等我一早起身去 東京迪士尼樂園 玩先!我沖完涼就同 Duffy 訓覺啦!
沒有留言:
張貼留言