見到呢篇文章個標題，同埋見到張圖，應該會俾我呃咗入黎！但係其實又唔可以話呃，因為佢又真係未曝過光，事關呢張圖係小弟親自創作嘅。點解我會無啦啦整呢張圖呢？咁係因為我真係冇咩好做，同埋好耐冇整過圖，一時技癢。( 啲圖俾個Blog系統自動縮細咗，睇唔清楚可以Click一Click，就會放大返。)
其實張圖係未整完嘅，除咗巡遊路線、遊樂設施同埋食肆之外，其他標示係未加架。同埋佢並唔完美，啲字型我搵咗好耐都搵唔到一樣，所以呢張圖啲字型係會有少少唔同。
好啦，不如就等我同大家直擊一下我點樣整呢張圖出黎架啦！原先我係想試下自製樂園指南嘅，但暫時只係去到以上張圖個進度。首先，我要搵黎一張原先咩標記都冇嘅樂園地圖。
因為搵唔到一張已經有齊三個新園區嘅圖，所以要用上面嗰張得 反斗奇兵大本營 嘅圖。之後就擦走返一啲邊緣位，再加入另一張 迷離莊園 嘅圖。
要好小心留意新加入嗰張圖同原本大嗰張吻唔吻合，之後就再加埋 灰熊山谷。
大家應該會留意到響呢一刻，啲邊界位係唔靚嘅，同埋有啲空白位冇咗啲樹。所以，就要慢慢加返少少樹，令整張圖變得完整好多。先係 灰熊山谷 同 迷離莊園 交界位。
之後就到 迷離莊園 同埋 反斗奇兵大本營 嘅交界位。
最後就輪到 灰熊山谷 同埋 探險世界 嘅交界位。
再補埋最後嘅空白位，成張樂園地圖就變得完整啦。
而家就將成張樂園地圖放入一個參照樂園指南大小嘅框入面。但我覺得最後可能未必夠位，遲啲可能要再擴大少少個框。
個綠色背景主要係俾我睇返個對比，去到呢到，見到張圖有白邊，要擦走返。之後就順便加返一個 金色米奇 圖章，即係講話入場費包哂所有野嗰個。而家樂園出嗰張就特別遮住 迷離莊園，我Scan咗出黎之後，就放咗響 馳車天地 上面。
好啦，冇理由用綠色背景咁核突架。所以我加返一張 迷離莊園 概念圖做背景。
睇返樂園出嗰啲樂園指南，樂園地圖周邊係會有一啲 奇妙仙子 嘅魔法閃粉。呢一步都幾考我功夫，因為要做到逼真嘅效果都有啲困難，不過最後都成功咗。
之後我第一樣加嘅標示係巡遊路線，因為我驚之後唔記得。=_=
之後就到遊樂設施，現有嗰啲我係跟返新嗰期樂園指南，迷離莊園 嗰啲我就係估嘅。( 到最後完成嘅時候，其實之後我想加咩都得，例如加個火車站響 迷離莊園，又或者可以加季節性項目，咁到時我就可以整一個屬於我自己心目中嘅完美樂園！)
最後就係加餐廳同埋小食亭嘅標示啦！
整走返個背景、魔法閃粉同埋 金色米奇 圖章，就係呢篇文章第一張圖嗰個樣啦！我會慢慢整落去，整一張自製嘅樂園指南！唔知大家覺得我呢個二次創作點呢？
沒有留言:
張貼留言