其實睇我個Blog嘅網友，相信大部份都係同我一樣係鍾意迪士尼嘅朋友。可能大家嘅著眼點都係 東京迪士尼渡假區，未必對呢啲郊外行程有太大興趣... 我都明白到呢一點，不過我又唔想跳黎跳去咁寫... 我係響 Day 5 先去到 東京迪士尼渡假區 嘅，而家已經寫到去 Day 3，大家再俾啲耐性，我啲文章會出得快啲架啦！ >_<
東京迪士尼之旅2012 - 旅程日誌
Day 3 日期：6月9日 (星期六)、地點：諏訪
訓完一覺，Duffy 佢地又即刻望兇窗睇風景，出面係一條馬路。雖然話就話係小鎮，但係條馬路都幾繁忙、幾多車架！
旅館有小型自助早餐，有飯食啊！Good！
食完早餐就離開旅館，坐車繼續我地嘅行程。中途駛經呢條馬路，旁邊有一棵棵嘅大樹，好優美。
坐車又冇咩野做，又影下相先！呢張相，上次同 Pooh 去日本，都有影過架！
好快就到達我地今日嘅第一個景點，諏訪湖畔。平時講起湖，都係一啲細細個，好快可以環繞一周嘅湖；呢個湖就真係非常之大，就算坐車可能都要半個鐘先行到一圈！當日去到都幾大風，所以即刻著返件褸。
有一架架嘅艇仔泊咗響到，一字排開。每架艇仔上面仲有編號。
去到湖嘅另一邊，有一架舊嘅火車頭放咗響到。
佢都幾大架，平時見到嗰啲都冇大架。
火車編號，D 51 824。
仲可以上去駕駛艙參觀，不過就頗為污穢...
湖嘅呢一邊仲有一啲天鵝造型嘅遊覽船，有大有細。
個天暗暗地，風亦大得令樹葉隨風飄揚。
湖畔上有一條小徑，徑嘅旁邊仲有一啲藝術品。
下一個景點離我地好近，之後我地就上車出發啦！下篇繼續！
沒有留言:
張貼留言