放榜後，選科後，又再一次進入冇野好做嘅日子！每年書展都會去睇下有咩書賣，本身都已經諗住今日去睇，就算三號風球亦唔會阻擋到我！而今日我最愛嘅收穫，就係呢本 Epic Mickey 英勇米奇 概念畫冊！
Epic Mickey 係一個電子遊戲黎嘅，不過我就冇玩過。我買呢本畫冊，主要係因為我鍾意睇人地畫嘅靚畫，加上入面嘅主題又幾特別，所以就買咗。
原來遊戲入面，米奇 會去到一個叫做 Wasteland 荒廢世界 嘅地方，對付邪惡嘅壞人。最得意嘅係，Wasteland 係以 迪士尼樂園 做藍本，係一個黑暗版本嘅 迪士尼樂園。以下呢張相係其中一幅畫，大家又估唔估到呢個係邊一個遊樂設施嘅黑暗版本呢？
每個 迪士尼樂園 嘅主題園區，響 Epic Mickey 都有黑暗版，以下就係 明日世界。
入面啲內容都好吸引，相信個電子遊戲都會幾好玩；睇完本畫冊之後，我可能會買返黎玩下！我另外仲買咗幾本小說畫冊同埋幾本生活漫畫冊，因為我真係好鍾意睇人地啲靚畫！不過我自己啲畫就唔係咁好，慣咗用電腦整圖；但其實我都幾鍾意畫畫，所以要努力啲練習啦！
我仲有另一個嗜好，就係睇完啲電影之後再買返啲小說返黎睇... 今次我就買咗 愛麗絲夢遊仙境 同埋 小飛俠 嘅英文版，兩套都係迪士尼電影，不過小說嘅係原裝故事，而電影入面通常都有少少改動，就等我遲啲再睇下兩者有咩唔同啦！
事實上，我並冇睇過 小飛俠 套電影，就算有睇過都係好細個嘅時候睇。我一直都好想睇呢套電影，今次係一個好機會，俾我睇呢本小說之餘，再去搵呢套電影返黎睇！( 到最後好有可能都係得個講字，上次講話想睇 小飛象，到而家都未睇！ =_= )
沒有留言:
張貼留言