空中迪士尼魔法 - 璀璨奪目的煙花表演

出面打緊風，風大雨大，你同我都響屋企都冇咩好做。不過，我就可以寫Blog，你亦可以繼續睇下我分享 東京迪士尼樂園 嘅野，一齊解悶！哈哈！

迪士尼樂園 其中一樣比起其他遊樂場及主題樂園獨特嘅地方，就係有煙花表演。而 東京迪士尼樂園 嘅煙花表演就叫做 空中迪士尼魔法 Disney Magic In The Sky。但因為呢個煙花表演係兩個主題樂園一同共用嘅，所以爆發時並唔係以城堡做中心。事不延遲，一次過俾哂響煙花表演期間影嘅相俾大家睇！

曾經聽人地講過，香港迪士尼樂園 嘅煙花表演係眾多 迪士尼樂園 之中最好嘅。的確，當我睇東京呢個嘅時候，我係覺得比較遜色嘅...  上面講過，因為兩個樂園共用嘅關係，煙花唔係用城堡做中心，個效果係冇咁好嘅；之後，佢嘅規模相對係比較細，每次只係放少少煙花，所以就冇咁震撼；到最後，係個表演長度太短，整個煙花表演唔夠五分鐘就完咗，睇開香港嗰個就會覺得唔夠喉...  但即使佢地嘅煙花唔夠我地好，佢地仲有另一個表演贏我地，究竟係咩呢？請留意稍後嘅文章！