期待已久嘅 香港迪士尼樂園 新園區，灰熊山谷，今日終於都開幕啦！為咗爭取搭頭班 灰熊山極速礦車，我今日上午8:15就出咗門口啦！由我屋企入樂園大約需要一個鐘，今日入到去嘅時候係9:10。
我個心不斷砰砰咁跳。等到10:00樂園正式開放，就同其他迪士尼Fans一齊衝入 灰熊山谷！( 以下呢張圖係我之後先影嘅，當時咩都唔理要跑入去，仲跑到我好累！)
響 灰熊山極速礦車 入口迎接我地嘅，就係 香港迪士尼樂園 營運副總裁 Mr. Noble。佢帶我地入去嘅時候，一路介紹等待區嘅佈置同埋簡單講述 灰熊山 嘅故事。佢亦同我地一齊坐頭班礦車，我響玩完之後亦有幸同佢合照！
可惜嘅係，灰熊山極速礦車 唔爭氣啊！開咗三班車之後就發生技術問題，去到11:30先重開。以下圖片可以見到有礦車停咗響蒸汽機上山路段，亦有工程人員進行檢查。
今日再入到去西部小鎮嘅時候，發現比起預演日多咗啲佈置。
就連商品車都加咗一個附有商店名稱嘅招牌同埋一個盞鬼嘅標示。
一部奇妙鑄幣機亦出現於黃金量重店嘅旁邊，但今日早上就暫時未能使用。
至於位於 灰熊山谷 入口位置嘅爆谷車，亦未開始賣爆谷。不過我就發現車上有個好可愛嘅裝飾，就係有隻灰熊響到推部爆谷機啊！
而 噴泉山谷 嘅爆發威力，就明顯比起試玩日強咗好多！
隨住新園區開幕，樂園入面嘅招牌同標示都要作出更新啦！果然，反斗奇兵大本營 入口旁邊已經換上新嘅 灰熊山谷 招牌，冇咗「2012揭幕」字樣。
美國小鎮大街 嘅遊樂設施資訊亭，灰熊山極速礦車 亦終於出現啦！
資訊亭內所顯示嘅樂園地圖亦作出更新，灰熊山谷 位置都係冇再寫「2012揭幕」啦！
幻想世界資訊亭 亦有作出更新，不過我就有個小發現，下一篇文章會再分享。返返去 灰熊山谷 嗰邊，迷離莊園 通道今日亦正式開放，以後就可以好方便咁來往 反斗奇兵大本營 同埋 灰熊山谷 啦！
近距離影低 迷離大宅 先！期待下年春天入去仔細參觀！
呢條通道比我想像中長，咁亦即係 迷離莊園 將會比我想像中大啦！
地下有啲類似鞋印咁嘅野，初頭都唔知係咩黎；但之後留心睇清楚個樂園地圖，發現地圖上顯示 迷離莊園 條路中間有啲草叢位，咁呢啲印應該就係將來會變為草叢嘅位置啦。
通道入面亦有啲中型盆栽，個底座都特別設計到配合返 迷離莊園 嘅嗰種主題。
反斗奇兵大本營 呢邊亦有指示牌。有咗呢條通道，呢個園區亦唔再需要提早關閉啦！
在 迷離莊園 內回望 灰熊山谷。
今日響 幸運黃金石小食亭 食午餐，試咗佢個通粉沙律，都幾新鮮，個汁仲好好味添。
除咗長通粉之外，仲有一啲 迪士尼朋友 造型通粉架！
今日亦試咗個奶凍。好多人都話佢好好味，的確係名不虛傳。個甜品杯整到好似啤酒杯咁，見佢咁得意，我又拎咗返屋企！XD
見到呢支所謂嘅蛋白餅好似唔錯咁，就買咗黎試。冇錯，我就係俾佢個樣呃咗。一咬落去，超甜，再加上有一種好怪嘅味，我唔知點形容，總之就係好古怪... 我平時就算唔鍾意嗰樣食物，我都會食埋佢，但呢支野，我食咗 米奇 嘅一邊耳仔就已經唔想再食... 佢得一個好嘅地方，就係上面啲合桃幾好味，我搣哂落黎食。不過都係唔建議大家試...
臨走之前，再影下 灰熊山極速礦車 嘅等待時間先！係45分鐘。
嘩！連單人乘客都要等30分鐘啊！咁就可以知道佢有幾大吸引力啦！
見到 香港迪士尼樂園 不斷咁擴張，真係好開心，好感動... 今日能夠坐到頭班礦車，大家一齊叫，完嘅時候一齊拍手，亦係一個好奇妙嘅時刻。期望 香港迪士尼樂園渡假區 可以繼續成長，繼續提供更多奇妙嘅體驗俾我地！當然，如果可以改埋名做 香港迪士尼渡假區 嘅話，就梗係最好啦！大家應該明我意思架啦！A_A
沒有留言:
張貼留言