兩日前同大家分享咗我想試下自製樂園指南，之前就加咗遊樂設施同食肆編號。過咗兩日假期，呢張自製嘅樂園指南，進度非常良好，各園區嘅資料經已加咗上去！原先我係想跟返現時官方樂園指南嘅六摺，但因為真係唔夠位，所以最後改為設定做七摺。 ( 小提示：Blog系統自動縮小咗張圖嘅大細，Click一Click就可以放大返。)
但係放大咗都未必可以睇得好清楚，所以我放大部份重點俾大家睇啦。
呢個位係 灰熊山谷 同埋 迷離莊園 個位。之前諗咗個方法令張圖清返少少，但係都唔係非常清楚，同埋兩個新區會特別清啲，同原本張圖會有少少唔吻合。
再一次同大家分享一下製作過程。完成地圖上嘅基本標示之後，係時候加左右兩邊嘅園區資料啦！首先係加框。
之後就加上每個園區嘅標誌同名稱。
既然加咗標誌，所以順便跳返去地圖嗰到，響每個區都加返標誌。
因為整張圖嘅物件太多，令到部電腦響製作時會變得好慢，所以我決定分返開地圖同資料。響下面嘅圖都可以發現到，三個新擴建園區嘅園區資料都已經加咗上去啦！迷離莊園 啲資料係我自己作嘅，而其餘六個主題園區就跟返現有嘅樂園指南。
因為 香港迪士尼樂園 官方網頁上啲文字都係複製唔到，所以我只好逐隻字打返出黎... 努力地打字，慢慢就完成埋 探險世界、幻想世界 同埋 明日世界。
為咗遷就返啲位，而家響官方嘅樂園指南上面，美國小鎮大街係響左邊嘅，但因為要遷就返加咗 迷離莊園，所以我調咗過去右邊。而全部七個園區嘅園區資料，黎到呢一刻亦經已完成！
最後就加返個地圖落去，就係呢篇文章嘅第一張圖。另外亦已經加上旁邊同埋最底嘅版權資料；左下角我寫咗 March 2013，因為呢張自製嘅樂園指南係模擬 迷離莊園 開幕後嘅情況；另外響右下角我亦加咗句英文標示，註明呢一份自創作品只係基於個人興趣而製作，並非官方出品。我之後就印咗一張出黎睇下個效果。( 因為屋企啲彩色墨就黎用哂，所以只好印黑白... )
之後繼續落去就係要加埋其他標記同指示，即係 Fastpass、洗手間嗰啲。下一次再同大家分享最新進度！
沒有留言:
張貼留言