終於開始講 東京迪士尼樂園 啦！當日，一踏入樂園，就黎到 世界市集 World Bazaar 呢個主題區。呢個區就好似我地香港嗰個 美國小鎮大街 咁，集多功用於一身。
市集嘅入口，掛上咗好大個 東京迪士尼樂園 嘅招牌。因為 迪士尼奇幻復活節 活動進行緊，所以都有啲復活節色彩，仲有 白兔先生！
呢個區都係依照美式建築風格所建設嘅。
除咗個名之外，呢個區同香港最大嘅不同之處就係佢係有蓋嘅。另外仲有一啲唔同嘅地方，例如巡遊路線唔會經過呢到，同埋呢個區係會有兩條分叉路直接通向 明日樂園 同埋 探險樂園，唔需要行到出中間。( 東京迪士尼樂園 啲主題園區，佢係翻譯為 XX樂園，而唔係 XX世界)
之後我入咗賓客服務中心，想拎中文地圖 ( 因為得日文同英文響手 )。無意中發現到，同香港一樣，呢到都會有整個樂園地圖嘅畫。望真啲，佢地以前未擴建時係未有 卡通城 ToonTown 嘅，呢幅畫都冇喎！香港嗰幅而家都係冇三個新區，唔知連 迷離莊園 都開埋之後，幅畫會唔會更新呢？定係好似人地咁都係維持返樂園原貌？睇完呢幅畫，就令我覺得，人地一開始真係已經大過香港好多！
之後去到一個叫 便士拱廊 Penny Arcade 嘅遊樂設施，可以話係一個小遊樂室，入面有啲小型遊戲機，例如足球機。係要另外俾錢嘅，不過唔多吸引，所以我冇試到。
另外仲有好多部奇妙鑄幣機！我響到整咗好幾個！
響市集嘅另一邊，就有一個叫 迪士尼畫廊 The Disney Gallery 嘅展覽。入面展出啲野同香港嘅 動畫藝術廊 差唔多，有啲一樣，亦有啲係香港冇嘅。入面係唔俾影相嘅，我本身唔知 ( 因為香港係俾嘅 )，所以影咗幾張；之後有位演藝人員姐姐走埋黎同我講，跟住我都自動自覺刪除返影咗嗰啲。
去咗 香港迪士尼樂園 咁多次，好多野都已經熟哂。黎到新地方，新得黎又見得返熟悉嘅野，感覺好特別。以下係佢地嘅遊樂設施展示板，同我地香港未電子化之前嘅嗰個差唔多。
另外，世界市集 呢到亦係眾多 迪士尼朋友 同大家見面嘅地方。迪士尼朋友 們都係集中響呢到同埋 卡通城 同大家影相。東京真係多好多不同嘅 迪士尼朋友，不過我影唔到相，因為個個都好多人圍住。
最後，講埋大細，我諗整個區係香港個 美國小鎮大街 嘅一倍，有好多商店，有一間專賣文具，有一間專賣家庭用品。同埋仲可以上樓，剛剛介紹完嘅 迪士尼畫廊 就係響樓上嘅。
下一篇文章將會講嘅係... 一個我覺得同佢身處嗰區有啲不合嘅遊樂設施...請留意，關於兩個主題公園樂園嘅文章，我唔係跟返我嘅行程講嘅，雖然我去之前睇熟咗個地圖，但我最後都係亂咁行嘅。同埋我有啲好玩嘅野玩咗兩次，咁廢時講兩次啦！當然，最精彩嘅野，我會放到最後先分享！嘿嘿！A_A
沒有留言:
張貼留言