上一篇講到，我認為呢一個遊樂設施，同佢身處嗰區好似有啲不合。因為 幽靈公館 Haunted Mansion 係恐怖野，同 夢幻樂園 Fantasyland 開心嘅主題有啲相違背。其他地方嘅 迪士尼樂園，都係放響 Adventureland。( Fantasyland，香港譯 幻想世界，東京就譯咗做 夢幻樂園。)
不過幸運嘅係，幽靈公館 外觀個氣勢都唔係好勁，雖然係有少少恐怖嘅氣氛，但係未至於掩蓋咗 夢幻樂園 嘅歡樂。
講到呢個遊樂設施，同 城堡、太空山 嗰啲一樣，都可以話係迪士尼經典，每個地方嘅 迪士尼樂園 都有一個。香港雖然冇佢，不過就有一個我地嘅獨有版本，亦即下年開幕嘅 迷離莊園。
入口同埋初頭嘅等候區都未算話係好恐怖。
不過之後就開始慢慢黎料啦... 先係一個小花園，有荒廢嘅閘門。
一入到去，我第一個感覺係... 嘩！咁似香港 迪士尼黑色世界 個 大街詭異酒店 嘅！可能係因為個背景故事都係差唔多，所以入面嘅佈置都差唔多。
首先黎到一間簡介室，應該係講啲背景故事俾你聽。但我唔識日文，所以我完全唔知佢講咩。呢個就係去 東京迪士尼渡假區 嘅壞處，佢地嘅官方語言係日文。
介紹完之後，個人像變咗骷髏頭啊！
之後就入到去一部升降機，但其實佢唔似升降機... 隱約記得細個嘅時候去 巴黎迪士尼樂園，嗰到就真係好似升降機。以下呢個燭台係響個升降機入面嘅，所以就係話佢唔似，升降機入面點會有燭台！不過個整體氣氛都唔錯，幾凝重。再配合動畫效果，感覺好震撼。
香港 大街詭異酒店 咪又係有部升降機嘅。不過佢係震震下扮郁。而呢間 幽靈公館 嘅呢一部就真係會落下一層架！本身嗰啲正正常常嘅壁畫，亦係慢慢露出佢地恐怖嘅真面目！
出咗升降機後，就黎到上車嘅地方... 雖然有幾盞燈，但都係好黑，不過咁先配合返個氣氛嘛！
呢到啲車個運作模式同 巴斯光年星際歷險 差唔多。不過佢地就冇得自己轉角度，而係預設咗幾時轉去幾個方向。上車呢到都同 巴斯 差唔多，都係自動行道。
入面好黑，同埋車上有喇叭，令你真正置身於故事之中！出到去，出口仲有一啲碑響到... 寫住 Restless Spirits 等嘅字眼... 永不安寧的靈魂... 咁即係...
順帶一提，入面啲演藝人員全部都交足戲... 入面應該係全個樂園唯一見唔到演藝人員笑嘅地方... ( 佢地啲演藝人員真係個個都好好笑容，我覺得好神奇！)
正常黎講，我玩呢個室內遊樂設施嘅時候都唔會影相。一黎係因為好難影，郁得快，又暗。二黎就係留返俾大家有機會時先自己發掘，咩都睇過哂，到當時就冇咗個震撼個感覺，真係冇咁多玩架！
不過有一個遊樂設施，我玩嘅時候真係忍唔住要影俾大家睇。我第一次玩嘅時候，全程都係呆咗... 因為實在太正啦！之後玩第二次時就影多啲相，等我可以永遠記得嗰種震撼嘅感覺！哈哈！嗰個遊樂設施係咩？我最後先會分享，因為係重點推介黎！:)
沒有留言:
張貼留言