自製樂園指南 - 終於大功告成!

又過咗兩日！之前嘅自製樂園指南，我終於都大功告成啦！可以見到，除咗原本地圖嘅嗰面，另一面啲資料我都整好咗啦！之前講過係七摺，所以有部份內容我都有調整到。

先講返地圖嗰面先啦！完成上次嗰個階段之後，就係要加返個指南針同埋兩隻米奇手。

好啦，再一次合埋返幅地圖同埋啲園區資料。

之後就係加設施標示，成個樂園都佈滿呢啲標示！

連園區資料上面嘅遊樂設施資料都加埋相對應嘅安全標示啦！

下一步就係加埋解說標示嘅一欄，以及加埋有關嬰兒車同埋吸煙區嘅兩個欄目。

再加埋 唐老鴨、高飛 同埋 布魯托，用黎填返個空位。因為呢張樂園指南係以 迷離莊園 做主題嘅，所以都揀返佢地三個驚驚地嘅樣。

完成一面，就要搞埋另一面啦。大部份都係跟返原先嘅排法，不過就配合返七摺。

個封面我就用咗 迷離莊園 做背景，偵探米奇 做主角，睇黎佢想查清楚 迷離大宅 入面有啲咩喎。不過呢隻 米奇 睇起黎同平時有啲唔同...  因為我唔識點將佢做到有平時官方樂園指南嘅3D效果...

其中一頁，我就特別放咗 迷離莊園 同埋 灰熊山谷 嘅介紹。

其餘兩頁，都跟返平時，只係有些少細微改動。例如響急救站資料一欄，更新返 灰熊山谷 有新急救站嘅資料。

排返好七頁，組合返做一張過先！

好啦，終於都整好啦，有咗呢個模板，之後要改都好方便！咁我就可以整一啲我想做嘅主題，Duffy 啊，迪士尼黑色世界 啊，點整都得！唔知道，大家心目中理想嘅 香港迪士尼樂園，又係點嘅呢？