放榜之後，搞完一輪大學揀科排位之後，繼續返返黎分享 東京迪士尼之旅。今次會講 卡通城 內嘅一個室內遊樂設施 兔子羅傑卡通轉轉車 Roger Rabbit's Car Toon Spin。
呢個遊樂設施位於 卡通城 入面嘅城中心部份，呢邊仲有 RogerRabbit 嘅雕塑噴水池！
雖然出面係 卡通城，但入面亦係另一個卡通市鎮，響等待區會經過不同嘅場景。一開始會有一個展示板，上面有廣告啦，通告啦，以及尋人啟示等等。
之後就黎到一間帽子製作工場，入面啲擺設都係好雅致架！
跟住就黎到一條小巷，有一棟棟嘅房屋，排隊時會經過一個又一個嘅門口。
離開小巷，入到去一個神秘嘅實驗室，入面有啲好特別嘅裝置，仲有瑩光綠色嘅警報燈。
其實響玩呢個遊樂設施嘅時候，我係唔知道佢背景故事嘅... 上網睇返，原來係講 Roger Rabbit 嘅老婆 Jessica 俾人捉咗，佢就上咗一架的士去搵返佢老婆。
上咗的士之後，就會去到響卡通市鎮入面嘅不同場景，沿途嘅街道上被撥滿毒藥；假如沾上呢啲毒藥，Roger Rabbit 就會從此消失，所以我地要避開呢啲毒藥！的士上面有一個轉盤，轉動佢就會令整架的士旋轉，可以避開毒藥。但我當時唔知呢個故事，所以只係亂咁轉個轉盤，哈哈！因為係以的士做主角，周圍亦有好多道路指示牌，配合返呢個主題。
結尾嘅時候，我地黎到一個的士車廠，呢到亦有一啲相關裝飾。
好啦，卡通城 入面嘅所有佈置同埋遊樂設施都已經分享完啦！卡通城 係一個好得意嘅園區，唔知你地又覺得 香港迪士尼樂園 應唔應該興建返一個呢？
沒有留言:
張貼留言