灰姑娘城堡的日與夜...

我地有 睡公主城堡，至於人地 東京迪士尼樂園 就有 灰姑娘城堡。因為我地嗰個係參照咗加洲 迪士尼樂園 嘅世上第一個迪士尼城堡，所以比其他城堡係細...  睇慣咗香港嗰個城堡，黎到東京，自然就會覺得人地呢個係特別宏偉壯觀。

由正面慢慢轉去背後，俾大家多角度欣賞一下呢個城堡啦！首先係稍微行過少少。

之後就去到旁邊嘅呢個角度，仲有一棵樹襯托！

最後就係背後，不過我覺得呢個城堡嘅背後冇咁靚...

呢到有條樓梯，就係城堡內 仙履奇緣童話大廳 嘅出口。

城堡背後呢到有一個我最愛嘅 魔法師米奇 雕塑，係之前慶祝 東京迪士尼樂園 20週年嘅禮物。我地香港一開幕就已經有一個，不過就唔係響城堡背後。

樂園中心位置，可以清楚見到城堡嘅正面，而呢到亦有幾個塔樓，就好似真係黎咗一個堡壘。

傍晚時我特別再影多一張城堡嘅相。我覺得橙色嘅燈光好配合黃昏所俾人嘅感覺！

同其他迪士尼樂園嘅建築物一樣，黎到晚上，加上燈光，城堡亦變得特別迷人。

講起城堡，香港嗰個因為要參照返加洲 迪士尼樂園 第一個迪士尼城堡，所以比其他城堡細...  有時候真係一啲妒忌人地啲城堡咁大座咁宏偉，不過我地都有一個賣點，就係我地個城堡有山做背景，係世上獨有架！( 其實我覺得冇咩特別，純粹安慰自己... )