東京迪士尼樂園 入面總共有七個主題園區，響先前嘅文章入面，暫時出現咗三個，而家就再次返到黎 夢想樂園 Fantasyland。但係我應承大家，下一輪嘅文章一定會出現另一啲園區！
香港迪士尼樂園 個城堡呢，就係冇得入去入面嘅，但東京呢個就唔同啦，係可以入去睇下 灰姑娘 嘅故事架！而呢個遊樂設施就叫做 仙履奇緣童話大廳 Cinderella's Fairy Tale Hall。
一入到去，就可以見到一啲同 仙履奇緣 有關嘅佈置。
入面亦有一啲一個正常城堡應該會有嘅裝飾，例如盔甲同埋旗幟。
之後係要搭升降機上一層嘅，部升降機都整得好華麗。見到呢張相入面嗰位演藝人員，令我諗起一樣野，就係東京嗰邊，每個遊樂設施嘅演藝人員都係著唔同嘅服飾架！亦即係話，響整個樂園入面係可以見到好多套唔同嘅服飾！
黎到第二層，一出升降機就會見到好多演繹出 仙履奇緣 故事嘅壁畫。
燈飾都係好靚好華麗。睇真啲，原來上面啲燈係用咗燭台造型架！
啲窗就用咗馬賽克風格，仲有一個代表 灰姑娘 故事嘅南瓜車添！呢到更加可以望到出面遠處嘅 小小世界！
而大廳入面就放滿咗好多有關 仙履奇緣 嘅模型。
最後就黎到一間休閒室，入面亦都係佈置得好華麗。
響呢到，你可以一嘗做王子或者公主嘅滋味！
女孩子們更加可以嘗試著上呢隻玻璃鞋，睇下自己會唔會係下一個 灰姑娘！
入面嘅其中一個櫥窗就放咗另一隻玻璃鞋。
整個童話大廳嘅面積都幾大，我都估唔到可以有咁多空間。不過人地個城堡響出面睇都已經好大，可以開到咁多位都唔出奇嘅。
沒有留言:
張貼留言