試玩後換上新主題背景, 迎接新園區開幕!

萬眾期待嘅 灰熊山谷，今個月14號就會正式開幕啦！由佢只係一塊平地，去到慢慢變成一個迷人嘅山谷，一路見證佢嘅誕生...  黎到呢一刻，真係有啲感慨，亦好想快啲可以入去一睹佢嘅真面目！

昨日終於都試玩咗，親身體驗呢個新園區嘅樂趣！仲記得，上一次 反斗奇兵大本營 試玩日，當我搭緊迪士尼線嘅時候，個心就已經響到砰砰跳，個腦就不斷幻想自己玩嗰啲新遊樂設施時嘅情景。其實我咁誇張嘅反應係情有可原嘅，因為第一次玩的確係最興奮嘅，面對自己冇見過嘅震撼場面，呢種新鮮感真係只能夠維持一次。當你玩第二次、第三次、第四次... 個感覺就已經係截然不同。

再趁呢個機會同大家分享一個關於我自己嘅小秘密。雖然去過樂園咁多次，但唔知點解，每一次當我決定好要去樂園之後，一係就係前一晚訓唔著，一係就係當日好早就起咗身。就算去到呢一刻，都仲係咁，每次都係咁；我都好想知背後嘅原因。可能，就連我自己嘅潛意識都深信，每一次入樂園玩，都係一個與別不同嘅體驗，都係一個值得期待嘅旅程...

好好彩，試玩日前一晚我訓到一個靚嘅覺！所以當日都好精神！ 玩嘅同時，我仲影咗啲靚相，亦更新咗呢個Blog嘅背景主題啦！( 背景圖片仍然進行緊調整，可能會影響到大家正常瀏覽，響到講聲唔好意思！)