呢篇文章係想同大家分享其他響 東京迪士尼渡假區 得黎嘅收藏品，而佢地真係好靚啊！首先想講嘅係樂園門票，我嗰張係兩日門票，爸媽嗰兩張就係一日門票。而兩種門票個樣都係冇分別嘅，背景係由兩個主題樂園入面嘅建築物構成。每張門票嘅右上角都有不同嘅 迪士尼朋友。我地三張門票分別有 高飛、米妮 同埋 Mo仔。
之後就係 迪士尼渡假區線 單軌鐵路嘅車票。單程票係冇咁靚架！呢種設計係要買一日或多日票先可以得到。我地就買咗兩日車票，所以就有呢張咁靚嘅 米奇和Duffy的春日巡航 車票！
以下落黎講嘅係一本叫 Discovery 嘅小冊子，入面係介紹整個渡假區嘅。響不同嘅地方，包括單軌鐵路站、酒店，同埋渡假區入面嘅商場都可以搵到呢本小冊子。
入面有整個渡假區嘅地圖，亦有區內不同景點嘅介紹，當然就唔少得兩個主題樂園啦！
以下呢份單張係響酒店房間入面拎嘅！係關於 東京迪士尼樂園 嘅 迪士尼奇幻復活節 嘅。整份單張設計到好似一粒復活蛋咁樣，而入面啲圖案亦都好靚！
最後分享嘅單張係關於 迪士尼渡假區線 嘅，響單軌鐵路站入面可以拎得到。呢張就唔係復活蛋，而係一架單軌鐵路火車啊！好得意！
整個渡假區咁大，入面可以拎多咁多不同嘅收藏品都好正常。唔知我地香港呢邊，幾時先可以發展到咁大規模呢？期待遲啲公佈嘅下一輪擴建計劃！
沒有留言:
張貼留言