各位睇開小弟呢個Blog嘅話，應該都會知道我習慣一次過出幾篇文章。而每次寫文章我都會分先後次序，重點推介嘅文章我會最後先寫，咁佢就可以排最頂啦！呢篇文章本身係今日幾篇文章之中其中一篇重點推介，並且一定要今日寫先有意義。但係我而家又寫唔切所以文章，所以只好出咗呢一篇先。最衰就係我下午不知不覺間訓著咗，夜晚又要出去食飯，搞到咁緊迫。好彩嘅係，我可以造馬，調整返每篇文章嘅時間，令到佢變返響最頂，哈哈！
返正題啦，前幾篇文章都係講 灰熊山谷，又講返 日本迪士尼之旅 先！但係，明明我係講開 東京迪士尼樂園，點解我又會跳咗黎 東京迪士尼海洋 呢？因為今日係佢地嘅大日子啊！全新遊樂設施 反斗奇兵瘋狂遊戲屋 Toy Story Mania，今日開幕啦！
今日同時係佢地夏日活動嘅開始，就好似上年香港嘅 反斗奇兵大本營 開幕咁。上個月去嘅時候，只能夠響草叢之間隱約影到門口個 胡迪。當時亦放咗個牌話係粉飾緊 ( 咁懶嘅，求其搵個牌就算 )，但今日應該會變得人山人海啦！
呢個遊樂設施，係位於 美國海濱 American Waterfront 呢個主題園區入面嘅。隨住佢嘅開幕，園區入面亦多咗一個叫 Toyville Trolley Park 嘅角落。
睇真啲，望唔望到招牌塔頂上嘅兩位 迪士尼朋友 係邊個呢？
呢排，眾多 Disney Parks 迪士尼主題公園 真係大事一籮籮！先有上個月美國 迪士尼加洲冒險樂園 Disney Carnifornia Adventure 更新後隆重重開，佢地全新以 反斗車王 電影做主題嘅 CarsLand 亦同時開幕！之後就到今日 東京迪士尼海洋 呢個新嘅遊樂設施 開幕。而今個星期六就係我地 香港迪士尼樂園 灰熊山谷 開幕嘅大日子！
上個月去嘅時候未開冇得玩呢個 反斗奇兵瘋狂遊戲屋，唯有下次再去嘅時候先再試玩啦！不過啱啱去完就講下次，我好似有啲貪心添... XD
沒有留言:
張貼留言