今次分享嘅，係一個香港都有嘅遊樂設施。黎到 明日樂園 Tomorrowland 入面嘅 巴斯光年星際歷險 Buzz Lightyear's Astro Blasters。既然黎到一個熟悉嘅遊樂設施，當然就要睇下佢到香港版本有咩分別啦！先講個名，無論英文定係中文譯名，都同 香港迪士尼樂園 嗰個無異。
但係個門口呢，就比香港嗰個嘅規模細好多，只係一個平常嘅入口。有啲畫同燈飾咁，冇咗香港嗰個巨型 巴斯 模型，比起上黎有啲遜色。
入到去等待區，就真係差唔多啦。都係有啲綠色小人嘅畫、巨型說明書佈置，同埋呢個對講機。
當然亦會有 巴斯 響到同各位太空巡邏員講解今次嘅任務！
假如你響 香港迪士尼樂園 玩過 巴斯光年星際歷險 的話，認唔認得以下呢幅畫呢？睇唔睇得出有咩分別？
冇錯！就係多咗啲分數響到啦！香港嗰到係冇顯示分數，要你自己發掘架！等待區啲佈置真係差唔多，但其實個面積就細好多，好快就去到上車嘅位置。
入面嘅佈局係同香港一模一樣！啲場景係一模一樣！唯一唔同嘅係，有啲分數設置係有少少差別，例如有部份菱形變咗三角形。唔知係唔係因為唔係自己主場嘅關係，我最後個分數好似差咗好多咁... 趁最後玩完等落車嘅時候就影下相啦！可以見到場景的確係同香港冇分別。
最後都係有等級表同埋 巴斯 多謝大家完成任務。
玩完出到去，就黎到一間以 反斗奇兵 做主題嘅商店。之前分享嘅嗰本 豆豆 X 綠色小人 筆記簿就係響呢到買架啦。其實大部份商品都可以響返 世界市集 嗰啲商店買到，不過我選擇響到順便買埋，因為我玩呢個嘅時候都已經幾夜，想慳返啲時間重玩啲好玩嘅遊樂設施。睇過 反斗奇兵 嘅你，一定唔會唔記得呢個場面！
「個爪決定邊個要走，邊個留低架！」「我被揀中咗啦！」
佢地個樣真係好搞笑！如果部機係真係可以玩嘅話，我諗我會試下！XD
沒有留言:
張貼留言