終於都黎到 東京迪士尼海洋 嘅最後一個主題園區啦！我放呢個園區到最後係有原因嘅！因為佢係咁多個園區之中最大、最多野玩嘅一個園區，同時亦分開咗三個部份。呢個園區就係 美國海濱 American Waterfront，海洋版嘅 美國小鎮大街。其實 東京迪士尼海洋 好多園區都係由原先 迪士尼樂園 嘅園區改成海洋版，令我覺得好特別。園區內三個部份嘅其中一個，就係呢個郵輪碼頭啦，船裡面係一個小型遊樂設施黎嘅；叫做 龜龜漫淡 Turtle Talk，亦即香港出現過嘅 哈囉阿古，可以同 海龜阿古 傾計。
呢個碼頭啲佈置都好細緻，有好多貨物，另外仲有一個舞台；呢個舞台會上演以 美女與野獸 名曲 Be My Guest 為題嘅舞台劇，開筵宴客 A-Table-Is-Waiting。
旁邊仲有一條大鐵橋，好有舊美國海岸嘅風情，仲可以見到遠處嘅重點遊樂設施 驚魂古塔。
碼頭上亦有一個巨型嘅螺旋槳，特別整到有少少鏽積，都幾像真。
離開碼頭，就會進入到呢個園區嘅另一個部份，美國小鎮啦！除咗好大間嘅百貨公司之外，街上兩旁都有好多店鋪，真係同香港嘅 美國小鎮大街 幾似。
街上亦有不同嘅車輛，不過就唔係俾人座嘅，只係單純用作裝飾。但佢地都有車俾賓客坐下嘅，叫做 大都會交通工具 Big City Vehicles，都係同香港嗰啲差唔多。
咦！呢架車同 迪士尼小熊 一樣，都係叫 Duffy 喎！呢個名同海洋有關，響呢個海邊小鎮出現都好正常嘅，甚至呢架車可能仲早過 迪士尼小熊 出現。
繼續睇下鎮上嘅其他裝飾先。有一個錢幣噴水池，有真錢有亦有假錢！XD
仲有一個我搵咗好耐好耐先搵到嘅郵箱，我就係用佢黎寄明信片架啦！
之前分享過嘅 東京迪士尼海洋電氣化鐵路，就係來往 美國海濱 呢到同埋 發現港嘅。
整條鐵路都係高架嘅，火車響鐵橋上行駛，坐響上面應該可以睇到好多好靚嘅風景。
呢條鐵路橫跨不同嘅道路，響鐵路鐵橋下面望上去，可以見到橋上有不同嘅街道牌。
講完 迪士尼海洋電氣化鐵路，最後送上一幅有 迪士尼海洋渡輪航線 船隻經過嘅相片。仲可以一次過見到哂 美國海濱 嘅兩座地標，驚魂古塔 以及 大郵輪！
沒有留言:
張貼留言