香港迪士尼樂園 同購物商場 Megabox 合作，舉辦大規模嘅新園區宣傳活動；商場內更加有不同嘅 灰熊山谷 場景佈置，俾大家體驗關於呢個新園區嘅冒險之旅。不過，相信大家同我一樣，更在意嘅，係宣傳活動中將會送出 灰熊山谷冒險之旅 棋盤遊戲。其實我自己都幾鍾意玩棋，周不時仲會逼爸爸媽媽同我一齊玩棋，今次 香港迪士尼樂園 首次推出棋盤遊戲，雖然係旅行裝，但又點可以錯過呢？
返到屋企，即時拆出黎睇下先！無論係包裝盒、棋盤，定係說明書都設計得好靚架！
盒內仲有一個袋仔用黎裝起所有配件，袋上更加印有 灰熊山谷 吉祥物，Lucky。
不過講起袋，我就覺得之前買返黎，用黎裝金塊朱古力嘅 灰熊山谷 布袋靚啲。
到配件啦，先有一個用黎噴人嘅 噴泉山谷 噴水樽，亦有一座用黎裝起所有金塊嘅小型 灰熊山。
之後就有三粒骰仔，仲有六架礦車做棋子，不過要用膠水先整得實，遲啲先再整啦。
最後就有四款不同嘅遊戲卡，包括 金石欠單、搗蛋卡、灰熊爸爸方向卡 同埋 小熊炸藥卡。
想擁有呢副棋呢，只要響即日至9月16日，響商場內作任何消費，之後去玩虛擬遊戲就得架啦！不過大前提係，要夠快！因為每日限量派100副，派哂就冇，只可以玩遊戲。我星期五嘅時候下午12:45去到，已經得返20副，平日都散貨散得咁快，真係慢少少都唔得！要消費先有，咁我又消咗啲咩費呢？就係想買咗好耐嘅 小飛象 電影影碟啊！響間商店到仲見到有 魔法師米奇 嘅 Fantasia，所以就買埋，不過就搵唔到 小飛俠...
一開始提及到商場佈置咗好多 灰熊山谷 嘅場景裝飾，順便俾大家睇下啦！響平台到設置咗一個小鎮場景響到，除咗售票處，仲有 米奇米妮、噴泉山谷、量金器等嘅佈置。
響 灰熊山 佈景版嘅下面，仲有一支灰熊爸爸好鍾意玩嘅轉向操控桿；我貪得意試過整下佢，係實嘅，如果整到真係可以轉向咁嘅話就好玩啦！XD
同一層仲有一架 一比一 灰熊山極速礦車 嘅模型響到，見到嘅時候即時有一種熟悉嘅感覺。
上多幾職就係玩虛擬遊戲嘅地方，呢個遊戲係模擬礦車行駛嘅過程嘅，都幾像真架！而遊戲區嗰到就有一個好巨型嘅 灰熊山谷 標誌。
另一邊亦有灰熊爸爸轉軌嘅場景，又有礦車，不過就唔係一比一。
上多一層就有西部囚室嘅場景，好多小朋友走入去玩，哈哈！
響商場內仲有派發 灰熊山谷冒險手冊 同埋 灰熊山谷宣傳單張，可以響平台嗰到搵到。
睇完嗰本說明書，副棋睇起上黎都幾好玩，等我搵一日又逼爸爸媽媽同我玩先！A_A
沒有留言:
張貼留言