每一個 迪士尼樂園 都會有一個主題園區關於未來嘅，香港就有 明日世界，東京就有 明日樂園。東京迪士尼海洋 呢到，亦有一個園區被設定為未來世界嘅港口，就係 發現港 Port Discovery。
呢到有一條高架鐵軌，會有 迪士尼海洋電氣化鐵路 DisneySea Electric Railway 嘅列車行駛；呢條鐵路係來往 發現港 同埋 美國海濱 American Waterfront 兩個園區嘅。
呢個園區內有兩個遊樂設施，其中一個係 風暴騎士 Storm Rider。係一個動感電影院，即係會包含感官體驗同埋張凳會郁嗰啲，不過就唔係3D黎嘅。故事係講氣象控制中心研發咗一架新飛機，可以去到颱風嘅中心觀測，邀請大家加入呢項任務。
周圍嘅建築物都好有時尚感，海上亦有一座座高塔，好得意。
大家可能會響上面嗰張相入面，發現有啲細細架嘅氣墊船，究竟係咩黎嘅呢？佢地就係呢個園區內嘅另一個遊樂設施，水上逗趣船 Aquatopia。其實就即係水上版嘅 馳車天地，可見英文名稱都好有心思，響原本 馳車天地 Autopia 呢個名字上特別加入「Aqua」，「水」，呢一個詞語。
最出嗰到有一條大霸，我覺得個大霸起得好有型，亦都係配合返未來風格架！不過，玩呢個 水上逗趣船 當然就去唔到咁出啦，但呢條大霸係有意義嘅... 其實呢到對出正正就係東京灣，亦即係真正嘅海洋，呢條大霸可以俾人一個好接近大海嘅感覺。事實上，響岸邊仲有馬路以及單軌鐵路等嘅交通設施，而呢條大霸亦可以完美地遮住呢啲設施。
講完條大霸，講返呢個 水上逗趣船 先，我有一個疑惑... 就係，如果乘客可以自由響呢個水池範圍內自由駕駛隻船，咁幾時先完呢？冇理由要求啲人自動自覺返去掛... 如果唔係，假如啲人全部唔返去，咁條排隊人龍咪永遠唔散？都係因為時間緊迫嘅關係，我地冇玩到呢個園區內嘅兩個遊樂設施，所以我唔知佢嘅運作原理。
我原本估計，係有一個計時器，一開始玩嘅時候就會計時；夠鐘的話，架船就會自動返碼頭。上網睇返資料，發現根本我一開始嘅推理方向經已錯咗，呢架船係唔可以自己駕駛架！呢架船其實同 東京迪士尼樂園 嘅 小熊維尼獵蜜記 一樣，都係用咗無軌系統。架船一早經已有一條預設路徑，以及預設嘅旋轉方向，乘客只係坐響到就可以啦。
另一方面，其實呢個遊樂設施係有兩條路徑俾乘客揀嘅；有一條會向你噴水，另一條就唔會。碼頭就係分開咗兩邊，一邊濕身一邊唔濕身，到你上船嘅時候就可以選擇。又係一個好貼心嘅設計！早知就玩埋佢啦！下次去 東京迪士尼海洋 嘅時候一定要試！
沒有留言:
張貼留言