手帕, 貼紙, 珍藏卡 - 更多 Duffy 系列紀念品!

東京迪士尼之旅2012 嘅分享都已經寫得七七八八啦，開始進入尾聲...  今次呢篇有關商品嘅文章會一次過介紹三款 Duffy 系列嘅紀念品！分別係手帕、貼紙、珍藏卡。

其實呢條手巾仔我都考慮咗好耐，因為去之前響網上見到都唔算平，諗住見到實物再決定。當日見到佢質地都唔錯，個款式都幾靚，所以就買咗返黎啦。

佢個設計比較純樸，只係得一個 Duffy 頭型圖案；但有時候，簡單就是美嘛！

最頂嗰到印有「Duffy The Disney Bear - The Bear of Happiness & Luck」嘅字眼。我好鍾意呢句描述，因為對於我黎講，Duffy 的確係一隻為我帶來歡樂及幸運嘅小熊！

呢條毛巾都有一個 Duffy The Disney Bear 招牌，採用藍底金字，閃閃下好靚。

至於貼紙，同響 東京迪士尼樂園 一樣，我都係買咗兩版，當然都係用 Duffy 做主題架啦！一款係 米奇和Duffy的春日巡航 活動限定嘅貼紙，上面可以見到好多關於今次活動嘅圖案。而另一款就係平時都會有得賣嘅，上面有好多 Duffy 腳印，仲有好多不同表情嘅 Duffy，好可愛！

最後就係珍藏卡，我地香港呢邊就係派嘅，但呢邊就要買嘅，300日圓一包，亦即約30港幣。個包裝整到好似人地嗰到遊戲卡咁，我拆完之後唔捨得扔，用膠紙整返好佢，哈哈！

每包珍藏卡內都有完整嘅一套七款卡；但設計就好似有啲求其，只係一啲活動相片...  我最鍾意嘅始終都係右上角嗰張畫，因為我覺得呢幅圖真係畫得幾靚。

相比下，明信片套裝好似好啲，因為每張明信片都係特別畫出黎！不過呢啲卡留為紀念都唔錯嘅！