聽日朝早9:00，就會知道大學聯招嘅結果，知道自己有冇大學讀，知道自己可以入咩科。正常黎講，響呢啲咁重要嘅時刻嘅前一日，我通常都會選擇入樂園玩下，放鬆下心情；但今次，好耐之前已經決定咗今日唔入去，因為暑假實在係太多人啦... =_=
今日，我就同兩位由細玩到大嘅好友去咗玩，去咗唱K！唱足幾個鐘！兩位好友之中，其中一位都係應屆文憑試考生，所以我地兩個都懷著同樣嘅心情...不過，其實一切都已成定局，又何必咁緊張呢；無論結果如何，都總要繼續向前走嘛！
我地今日就響銅鑼灣唱K，咁啱，新開嘅 誠品書店 又係響附近喎！誠品 出名書種多，所以響唱K之前，我就特別去行下，睇下會唔會有兩本我想買嘅書。去到嗰到，一共有三層，其中一層有藝術專區，藝術專區入面又有電影藝術專櫃... 估唔到，有一個小角落，全部都係一啲關於迪士尼電影嘅書！仲要我想買嘅兩本都有啊！
見到心頭好，當然就係買返屋企據為己有啦！兩本都係正野黎架！先講 反斗奇兵3 嗰本啦！
全名係 The Art Of Toy Story 3，同之前嘅 Epic Mickey 一樣，都係畫冊黎嘅。
我想買好耐架啦，不過香港唔多書店有得賣，再加上出咗一段時間，所以搵咗一段時間都買唔到。一揭開本書，就有好多概念草圖，全部都好靚；仲有好大個 Toy Story 3 嘅標誌。
雖然書名係標明 Toy Story 3，但其實書入面有齊哂三集 反斗奇兵 嘅畫同埋草圖架。
有啲畫響網上面都見過，特別係呢張「托兒中心的日與夜」，引象好深刻，因為個效果好正。
書內基本上有齊哂電影入面每一個角色嘅草圖，但好似 勞蘇 呢啲較重要嘅人物，會多啲圖。睇下呢隻身上散發著士多啤梨味道嘅熊仔！表情好豐富喎！
全書我最愛嘅，就係另一套總共四頁長嘅故事草圖，整套草圖夾夾埋埋就係完整嘅電影故事啦！
至於另一本買咗返黎嘅書，無論係講緊實物質量定係內容方面，都可以話係超級重量級！書名叫做 The Art Of Walt Disney: From Mickey Mouse To The Magic Kingdoms And Beyond。個書名好長，書內嘅內容係講述關於 迪士尼公司 由成立開始嘅所有製作同埋發展；即係會由一隻 米奇老鼠 開始講起，之後再到各個 迪士尼主題公園，仲有更多更多嘅資料。作為一個 迪士尼 粉絲，呢本書可以俾我深入了解 迪士尼 文化嘅發展，令我可以認識更多。
一揭開本書，又係已經有好多好靚嘅草圖；有 米奇、七個小矮人 等嘅迪士尼朋友。
迪士尼公司 原本就係藉住動畫製作而成立嘅，所以書入面當然要講下 迪士尼動畫啦！舊又好，新又好，呢本書都全部有記載架！木偶奇遇記、獅子王 等等... 都係一啲耳熟能詳嘅動畫。
呢本書其實好耐之前已經面世，之後都有跟返時代變遷而改過幾次版；其中一次改版，就因應返 迪士尼公司 收購 Pixar彼思，而加入返啲關於 Pixar 電影嘅資料。
除咗 迪士尼 同埋 彼思 嘅動畫電影之外，書內都有一部份係關於其他 迪士尼 嘅電影架。比較熟悉嘅，就有 添布頓 導演嘅 怪誕城之夜 以及 愛麗斯夢遊仙境，我都幾鍾意呢位導演啲戲！
去到整本書我最感興趣嘅一部份，係專門講述不同嘅 迪士尼主題公園 架！
入面有一幅好大幅嘅加洲 迪士尼樂園 原先計劃圖，我研究咗一陣，發現同而況都有幾大嘅出入。
另外亦講到佛羅里達州嘅 華特迪士尼世界，呢到提及 迪士尼公司 開始引入更多不同嘅主題樂園。
仲有一啲關於我剛剛去完嘅 東京迪士渡假區 嘅篇幅，有 世界市集、巨雷山、美國海濱 等等... 不過我唯一比較失望嘅係，呢本響2011年出版嘅版本，竟然冇提及過 香港迪士尼樂園！
其實，我原本以為呢本書都會係比較多圖；但打開之後先發現，原來都好多文字架！咁多文字，資料一定好豐富好充足！唔知要幾耐先睇得哂呢本咁厚嘅書呢？一年得唔得呢？
兩本書夾埋都唔平架，不過我覺得都值呢個價錢嘅，因為書入面真係有好多野睇！當係送俾自己嘅入大學禮物啦！一次半次冇所謂啦！( 車~ 而家入硬咩~ 講講下就變真架啦 XD )
好啦，距離結果公佈得返唔夠10個小時，希望聽日會有機會響呢個Blog到向大家傳來喜訊啦！而家等我又同 Duffy 佢地訓返個靚覺先，希望訓得到啦...
沒有留言:
張貼留言