( 呢排都專注講返 迪士尼黑色世界2012，但我生日嗰次迪士尼之旅仲有好多篇未出... 唯有慢慢逐篇出返啦... 呢篇文章啲相其實早前已經上載咗上黎，不過就黎到今日先寫... =_= )
兩間酒店都有一個好靚嘅花園，不過相比起 香港迪士尼樂園酒店，呢邊就時尚好多。叫得做 迪士尼好萊塢酒店，花園亦都以好萊塢做主題，周圍可以見到好多同電影有關嘅佈置。
沿著花園大道行，首先會黎到泳池嘅入口；地面印有 HollywoodRecords 好萊塢唱片 嘅字樣。
繼續行，就會見到一個櫃檯，我原先以為係詢問處，但行埋去之後又冇人... 呢到設計成好似一個電影售票處咁，應該係俾賓客影相嘅；兩旁更加放咗一啲 迪士尼 電影海報。
之後就黎到 迪士尼好萊塢酒店 嘅巨型招牌，每個字母都好巨型，仲大過一個人，好有氣勢！
招牌旁邊有一條小路，寫住 Mulholland Drive，唔知有啲咩呢？入去睇下先！
原來係馬路黎架！不過唔洗緊張，冇車行嘅，啲車只係泊咗響到，郁都唔郁。
啲車咁靚，應該唔係小兒科喎！一定係俾明星坐架啦！但係車門鎖住咗，冇得扮明星添！>_<
響酒店嘅戶外範圍，全部都係呢啲 米奇 圖案木椅，呢條小路入面都有幾張放咗響到。
呢條小路被設定為一條高速公路，旁邊可以見到路牌以及防撞欄等嘅裝飾。
當我諗住繼續行，響另一邊出返去嘅時候，我先發現呢條其實係一條掘頭路...
不過以上所講嘅野都唔係我覺得呢個花園最正嘅地方，最正嘅係，呢到有一個超級廣闊嘅草原！我覺得呢到好似一個高爾夫球場！景色優美，又夠大，總之就俾人一種好清新嘅感覺！
有一個小山丘；從呢幅相可以見到，當日真係天朗氣清！旁邊仲有一個小遊樂場俾小朋友玩。
響草原望返過去酒店嗰邊又係點嘅呢？可以清楚見到整座酒店，顏色鮮明，真係好有時尚感。
海邊仲有一條海濱長廊，由 迪士尼碼頭 以及 香港迪士尼樂園酒店 嗰邊一直延伸過到黎呢到。
都係嗰句，響 迪士尼渡假區 嘅每一樣野，入夜後配上燈光，的確會散發出一種獨有嘅魅力！食飯前除咗去咗泳池影相之外，亦特別去到花園嗰到睇下夜晚又係一個點樣嘅世界。
講起夜晚，除咗去花園影相，同埋食自助餐之外，仲有一個好奇妙嘅體驗！遲啲再同大家分享！:)
沒有留言:
張貼留言