星期六去之前上網睇返，原來 奇妙處處通 會員專享三折精品優惠9月30號就完結；我之前都冇特別留意，估唔到咁快完，所以嗰日入樂園嘅時候就把握機會，瘋狂掃貨！其實今次都唔算好瘋狂嘅，都係買咗三樣商品啫。而其中一樣就係呢隻磁石 Duffy 啦！
佢已經係我地 Duffy 家族嘅第十二位成員啦！歡迎加入！屋企真係愈黎愈多 Duffy！無論係冇優惠又或者有三折嘅時候，我都唔係太特別想買佢返黎，因為真係唔知有咩用... 但諗諗下，三折喎！咁抵，唔買好似好笨咁... 咁就唔好理啦，一於買咗返黎先算啦！好啦，咁真係買咗返黎啦，我都係唔知有咩用架... 暫時俾佢同啲迷你 Duffy 一齊玩住先啦！
睇上面嗰兩張相，第二樣商品都呼之欲出啦！冇錯，就係 反斗奇兵 字母積木啦！因為我覺得用啲積木拼啲字出黎好得意，所以一直都好想買，但原價大約$300就令我卻步... 估唔到今次三折優惠，字母積木會係其中一樣精選貨品！終於可以將佢據為己有啦！
最後一樣都係 反斗奇兵大本營 嘅系列精品黎嘅。( 大部份精選貨品都係 反斗奇兵大本營 系列 ) 係撲克牌黎嘅，樂園推出嘅撲克牌通常都設計得好靚，所以我都鍾意買啲得意啲嘅撲克牌返黎。反斗奇兵大本營 開幕時我已經睇中咗呢幅牌，不過都係因為認為原價$60唔太抵而冇買到。嘩，好彩我當時冇買到咋，今次買咗返黎，原來啲牌設計都好求其，得幾張係比較靚！
經過為期一個月嘅三折推廣期，唔知大家有冇好似我咁，買到一啲心頭好返黎呢？
沒有留言:
張貼留言