星期四再次去到樂園玩黑色世界，入到去第一個感覺係... 嘩！咁少人嘅！因為國慶假期剛剛完咗，所以特別少咗某種遊客，感覺係清靜咗好多，亦都玩得舒服好多！日間基本上完全唔洗排隊，標題提及到「寂靜的校舍」，其實係講緊連 詭墳學院 都唔洗排隊！不過呢一刻係因為巡遊進行緊所以先冇人，巡遊完咗之後，啲人又即刻衝返黎排隊玩，哈哈！雖然日頭冇咩人，但入夜後 詭墳學院 一度要排90分鐘，亦再一次証明今年黑色世界都幾受歡迎。
上次明明知道 動畫藝術廊 有得畫 Jack 同埋 Zero，但偏偏唔記得咗去，今次我就走咗去畫 Zero！原來 Zero 都唔係咁易畫！原本個身我畫得太細，搞到好怪，之後我強行加大返少少，先好少少。
畫完畫一出黎，就見到 布魯托 響到同賓客影緊相，等我又響旁邊偷影下先！佢戴咗萬聖節帽同埋領帶，好得意！佢走嘅時候見到我影緊佢，突然走過黎同我握手，真搞鬼！
好，鏡頭一轉，已經黎到夜晚啦！我又去咗影下 米奇 同佢班老友記響 幻想世界 跳舞！但係我都係有啲唔開心... 因為我去咗咁多晚，都未見過 Duffy 出黎同人影相！我想同佢影相啊！
再一次見到 Jack 同埋 Sally 響城堡後面同人影相。咦，佢地響到敲緊門喎，唔知後面有啲咩呢？XD
出返 美國小鎮大街，呢到繼續成為殭屍黨同埋狼人族嘅對戰舞台！殭屍黨要繼續加油啊！
黎到晚上七點半，又夠鐘睇 夜光鬼魅巡遊！我特別響 Jack 黎到城堡嘅一刻影咗以下呢張相。
我真係好鍾意 夜光鬼魅巡遊，因為響晚上睇巡遊同日間嘅感覺真係好唔同！真係吸引好多！( 因為我想嘗試唔好成日用閃燈影相，所以呢一日啲相有部份係失咗手，比較朦，唔好意思 >_< )
明日世界怪誕夜 嘅派對繼續有表演睇，有遊戲玩；我又俾人叫咗上去玩，今次係要扮鬼臉！而我亦都終於第一次睇到 創戰記 表演 ElecTRONica！但係比我預期中冇咁好睇...
之前響 奇妙處處通 專頁見到 大街餐廳 推出咗 夜光鬼魅套餐，會員有折扣優惠，所以有啲心郁郁... 因為知道佢地啲菜色會有特別嘅設計，好似好得意咁！呢一晚唔知點解特別興奮，就決定去食！呢一次應該係我咁耐以黎第二次黎 大街餐廳 食飯，更加係第一次自己黎，主要係因為價錢較貴...其實今次有優惠都唔係平好多，但既然今次俾佢引誘到，一次半次就算啦！當係一次奇妙體驗囉！
啲食物嘅造型真係好有趣！有蜘蛛、南瓜、蝙蝠等等；啲醬汁仲整得有啲似血漿... A_A
不過我覺得最過癮嘅都係呢杯特飲，佢地放咗盞燈入去閃下閃下，飲飲下仲會有隻眼望住你...
用一餐完美嘅晚餐黎為呢個晚上黎做一個終結真係最適合不過！( 仲好驚奇添！ ) 又響 迪士尼黑色世界 過咗好開心嘅一日，係時候返屋企啦！下次先再黎挑戰黑色世界啦！
沒有留言:
張貼留言