上次剛剛講到有一個小發現一直都冇同大家分享，其實係有原因嘅，因為要影相嘅話會麻煩啲... 事關呢個小發現有部份位置比較遠，要用長鏡頭先影得清楚，但個長鏡頭好重，我而家好少拎... 而昨日為咗完成呢篇拖延咗咁耐嘅 樂園事物仔細尋 文章，我終於都拎長鏡頭入樂園啦！
呢個小發現就係 灰熊山谷 嘅礦井編號啦！有啲比較易注意到，有一啲就難少少先睇到。講到最易嘅一個，就係呢個 1號礦井 嘅招牌啦！只要一入等待區，行前少少，就可以見到！
但其實真正嘅 1號礦井 並唔係位於呢到，個招牌只係為咗紀念性質而搬咗黎呢一個位置。咁真正位置係邊到呢？答案可以響採礦公司辦公室搵到！原來就係上山搵 灰熊爸爸 嗰到！
至於另一個都係可以響等待區入面搵到嘅礦井，就係 2號礦井；呢個位下面更加會有礦車經過！
好啦，難度升級！你知唔知道 7號礦井 響邊到呢？原來一開車之後入去嗰個就 7號礦井 啦！響出面可以見到印有 7號礦井 嘅字樣，響戶外等待區同埋 幸運黃金石小食享 都可以清楚見到。
講完 7號礦井，就到 9號礦井 啦！9號礦井 位於 灰熊山谷 近 探險世界 嘅入口，都唔難搵嘅。只要行行下嘅時候望出去，又或者坐礦車嘅時候留意一下，就可以搵到架啦！
難度繼續升級！今次到 44號礦井！係44，唔係4喎！雖然兩個號碼都係不幸，但係差好遠架喎！灰熊山極速礦車 邊個位會發生不幸嘅事呢？哈哈，就係斷纜嘅位置！相信佢亦係最高嘅一個礦井！
終極挑戰，14號礦井！如果你連呢個礦井都知道響邊，咁你就可以成為一位真正嘅 灰熊山礦工 啦！呢個位真係比較難先察覺到，因為平時都冇咩人行過；不過坐緊礦車嘅時候都有可能會見到。位置就係響 灰熊山谷 嘅邊緣，只要響 探險世界 入黎嘅時候，行斜路嗰邊，望出去就會睇到架啦！
除咗以上咁多個礦井之外，響玩緊 灰熊山極速礦車 嘅時候仲可以見到更多礦井架！分別有 8號礦井 ( 假如 灰熊爸爸 冇搞搞震的話，我地原先就可以入去呢個幸運金礦架啦 )，4號礦井 ( 灰熊爸爸 令到我地轉入去嘅礦井 )，以及 13號礦井 ( 最後落車前灰熊母子出現嗰到 )。下次去坐 灰熊山極速礦車 嘅時候，不妨留意一下，睇下搵唔搵得齊咁多個礦井啦！
同場加映，送上一幅相片：係響 灰熊山谷 內嘅 噴泉山谷 影嘅，礦車經過導致水花四濺嘅情境！:)
沒有留言:
張貼留言