估唔到之前七年冇去過 海洋公園 嘅我，響六月尾去完之後，咁快又再有機會去玩... 響呢個時間去 海洋公園 都只係得一個原因嘅啫，就係同朋友去玩 十月全城哈囉喂 啦。
響上次去玩完之後寫嘅嗰篇文章都講過，因為我個人黎講並唔係太鍾意 海洋公園，所以我都唔會好似 迪士尼黑色世界 咁寫啲好詳細嘅遊玩報告，不過都會簡略咁講下感受嘅。( 話就話簡略，但都幾長，希望大家有時間的話都可以睇下，因為都算總括咗我多年來嘅想法... )
無論作為 迪士尼 粉絲又好，抑或普通嘅遊客又好，我都會覺得 迪士尼黑色世界 係更加值得欣賞。我咁講好似好主觀咁，但係請注意，我唔係講緊好玩啲又或者更值得去，而係更加值得欣賞。因為我好認為 迪士尼黑色世界 響好多方面都做得比 十月全城哈囉喂 更好，更優秀。響鬼屋嘅細緻程度、鬼屋嘅格局、活動主題故事、氣氛、園內佈置等等，迪士尼 都係更膀一籌；而呢幾方面亦係全世界咁多個 迪士尼主題公園 嘅強項，不過遊客會唔會去欣賞就係另一回事。
海洋公園 當然亦有自己嘅強項，相信亦係咁多年黎 十月全城哈囉喂 可以咁成功嘅主要原因。海洋公園 比較著重嘅係驚嚇方面嘅效果，務求令你響鬼屋內外都可以被人嚇到好興奮。無疑，一般年青人，包括我自己，不斷俾人嚇、見到啲好得意嘅鬼，係會覺得好刺激好過癮。但係同時間，係玩緊嘅時候，有時會覺得有啲野好似做得好求其，係為整而整咁。
另一方面，海洋公園其實限制係少好多，好多野做嘅時候會自由好多，做起上黎會簡單得多。例如，佢地可以好隨便咁因為要搞哈囉喂，而用埋後台區域，俾遊客入埋後台區域；唔需要怕影響公司形象，亦唔太需要擔心會嚇親小朋友，所以恐怖成份去到幾盡都冇所謂；仲有就係，佢地嘅表演者唔會有一個特定嘅背景角色，可以好隨便咁同遊客互動、講野。至於 迪士尼，因為擁有自身嘅品牌形象同埋原則，有啲野係絕對唔可以做嘅。所以，海洋公園能夠更加容易咁響活動入面做加入更多題材、元素，去遷就遊客嘅品味。
每個人都有自己嘅喜好，響 迪士尼 同埋 海洋公園 之間，自然各自會有自己比較鍾意嘅一個。我係一個比較感性嘅人，換言之，迪士尼樂園 嘅主題故事、氣氛係更加適合我。我突然咁有心機去寫咁一篇咁長，關於 海洋公園 嘅文章，係因為覺得可惜。每一年嘅萬聖節，總會聽到有人咁講：「去萬聖節活動，仲洗諗？梗係 海洋公園 好玩啲啦！」其實係好唔公平，因為兩邊都有好玩嘅地方，有值得去嘅原因，但係 迪士尼 就往往被人標籤咗。
有時都會希望一直響心中經已標籤咗 迪士尼樂園 嘅朋友，可以嘗試轉一轉個角度去睇呢個樂園。假如有機會去玩，無論係 黑色世界，抑或係平日，都唔好只係抱著一種去玩、尋求刺激嘅心態。因為呢個「主題樂園」，仲有好多野都等緊你去發掘，值得你去欣賞箇中奧妙。就好似我呢排玩多幾次 詭墳學院 嘅時候，慢慢會發現，原來入面有好多之前忽略咗嘅佈置；入到去嘅時候，除咗俾人嚇之外，亦都好似玩尋寶遊戲咁，一路行一路搵一啲有趣嘅佈置。能夠將自己親身投入樂園嘅故事世界，感受一下入面嘅故事氣氛，必定會玩得更開心！呢個亦係我欣賞呢個樂園，鍾意呢個樂園嘅最大原因！因為只有 迪士尼 先做到最完美嘅效果！
最後總結，我昨日響 海洋公園 嘅公園指南入面見到佢地嘅願景「海洋公園 力求成為一個世界級具領導地位的主題公園，為遊人帶來一個既開心又難忘的旅程，將遊人與大自然緊密連繫起來。」我只能夠說，海洋公園 要真正成為一個「具原創性」嘅「主題公園」，仲有好長嘅路要行... 總之，希望 香港迪士尼樂園 同埋 海洋公園，兩者都可以響未來繼續努力，繼續進步啦！
沒有留言:
張貼留言