星期四去咗 海洋公園，昨日星期日返到去我主場玩 黑色世界！始終都係 迪士尼 比較啱我性格！今次好可能係我最後一次可以完全體驗 迪士尼黑色世界2012，因為都未必會再入去啦... 或者萬聖節當日會再入一入去啦，不過上完堂入到去可能已經晚上八點幾，應該會錯過部份節目。如果萬聖節真係入去，相信兩間鬼屋一定會好多人排隊，所以今次亦都把握機會玩多最後一次！同之前幾次一樣，一去到下午兩點鐘，我就準時去到排隊，咁就唔洗等咁耐啦！
玩完兩間鬼屋，我就返到去 美國小鎮大街，上次剩係畫咗 Zero，今次當然要畫埋佢嘅主人 Jack！
唔好以為佢個樣咁簡單就好易畫，原來都有難度架！好彩，我畫嘅呢幅應該都仲認得出係 Jack 嘅...
上次響 動畫藝術教室 旁邊就有 Pluto，今次仲有 Goofy 一齊響到添啊！等我又走埋去影下佢地先！
我終於都借咗爸爸部手機拎入樂園玩 黑色聯盟戰！所以今日嘅主要任務就係要去 黑色聯盟私會！之前響應用程式慢慢玩下玩下就拎咗大約二十萬分，今次終於都有機會同 殭屍詭姬 見面！私會完結之後，即時傳送咗以下呢一條訊息俾我，仲可以下載埋最後一幅好靚嘅手機背景圖片！
嘿嘿，同 殭屍詭姬 見面之後，我就即刻轉黨！點解我咁唔忠心呢？因為我想同埋 狼人戰臣 見面！雖然我轉咗去狼人族，但係我嘅心依然響殭屍黨架！殭屍黨要繼續努力啊！要蠃啊！因為轉黨之後，之前嘅所有戰績會被重置，所以我就響樂園入面搵黑色印記，務求要拎返五萬分！
響搵完黑色印記之後，我突然發現我之前猛咁玩係有少少多餘，因為樂園入面嘅印記真係好強！我諗我搵咗嘅印記，大約只係全個樂園入面嘅一半，但係我已經拎到十五萬分！每個都加好多分！既然已經超額完成，我又再次返到去 黑色聯盟報到中心，同 狼人戰臣 進行秘密私會！
黎到傍晚，都係同之前幾次差唔多，睇下 迪士尼朋友 同埋 殭屍戰狼人，影下相。但係我都仲係有啲唔開心！因為 黑色世界 活動只係剩返大約一星期，我都仲未見過 Duffy 出黎！
響樂園官網見到，夜光鬼魅巡遊 響部份比較多人嘅日子會有兩場，唔知道萬聖節會唔會有兩場呢？如果嗰晚得一場的話，咁呢一次已經係我今年最後一次睇 夜光鬼魅巡遊，所以我都特別珍惜！
玩得開心，又能夠促使我買野！呢一日嘅戰利品，黑色世界 主題文件夾，同埋兩款奇妙紀念幣！( 玩得開心就有心情買野，但我又成日話要慳錢，咁我應該希望自己玩得開心定唔開心好呢？XD )
沒有留言:
張貼留言