響一個寧靜嘅美國小鎮入面，有一間學院，叫做 貴凡士學院，為鎮上嘅孩子提供高等教育。學院內設有書院制，將學生分到兩間擁有截然不同風格嘅書院，分別係 歌帆書院 同埋 賽布書院。兩間書院的學生都希望自己嘅書院可以成為優勝者；為咗不斷爭取學分，兩間書院開始互相敵視...
響鎮上有一對青梅竹馬；出身自貴族世家嘅女生，帆佩兒，以及來自平凡家庭嘅男生，維爾。雖然背景好唔同，但係因為大家住響附近，佢地好多時都會一齊去玩，一齊慢慢咁成長。
當去到要接受教育嘅年齡，佢地雙雙被送到去 貴凡士學院 讀書；可惜，佢地被分配到不同嘅書院。儘管佢地好懷念昔日一齊玩嘅時光，但礙於各自嘅書院身份，佢地響學校入面只可以扮唔識對方。最後，佢地約定每星期搵一晚，響森林偷偷地見面，重拾以往嘅快樂，更加慢慢成為情侶...
雖然森林入面好黑好陰森，但係佢地都好鍾意響森林入面見面，因為響呢到唔需要擔心俾人見到。不過有一晚，不幸嘅事發生響佢地身上；嗰晚明月高掛，但森林入面就好黑，令佢地搵唔到對方。維爾 響森林入面不斷叫喊，不斷尋找 帆佩兒；突然，一隻狼走近，撲向 維爾，用爪抓傷咗佢... 至於 帆佩兒 就響森林入面迷路，森林好黑，佢睇唔到前面嘅路；就響一剎那，佢俾一堆蝙蝠包圍...
響嗰一晚之後，就再冇人見過 帆佩兒 同埋 維爾 嘅蹤影... 同時，貴凡士學院 開始傳出詭異嘅傳聞... 兩間書院嘅學生響宿舍入面分別聽到狼叫聲同埋蝙蝠嘅拍翼聲，呢啲古怪傳聞令學生們都好害怕。但係，有人就認為呢啲傳聞只係另一書院搞出黎嘅惡作劇；兩間書院之間嘅仇恨就係咁再度加深...
但係，可怕嘅事並未有就此完結... 響一個月後，同樣係一個月圓之夜，整個學院都被黑暗籠罩。響學院嘅花園入面，有一間石屋，石屋外有四座學生銅像，分別代表 貴凡士學院 嘅四條校訓。就響呢晚，石屋內發出強光，兩個身影從屋內行出黎；佢地用仇恨嘅目光對望，之後就轉身離去...
日出後，有學生發現，原先美麗嘅花園變成廢墟，原先嘅四座學生銅像更加變成四位魔間守衛... 面對眼前所發生嘅事，貴凡士學院 嘅學生終於醒覺，自己已經響不知不覺間墮入不幸之中...
不過，依然有人唔相信眼前嘅事實，想徹查到底；而佢地就係 歌帆書院 同埋 賽有書院 嘅領袖生。兩位領袖生分別帶著自己嘅同學，去到石屋前面；佢地聽到有人響石屋入面叫佢地入去... 唔知點解，佢地深深被呢把聲吸引，佢地想離開，但係走唔到... 最後，聽從呢把聲音走咗入石屋...
就係咁，冇人再見過佢地嘅蹤影... 同時候，亦有更多學生，以及鎮上嘅居民突然失蹤... 正當大家都覺得好奇怪嘅時候，失蹤嘅人突然返返去自己嘅崗位，不過就冇透露過發生咩事... 佢地好正常咁繼續工作，但其實，佢地嘅身體已經產生極大嘅轉變，只係平日會隱藏呢種轉變。原來，佢地早前經已被 殭屍詭姬 同埋 狼人戰臣 招攬成兩大魔黨嘅成員，變成殭屍或者狼人。
每個月嘅月圓之夜，殭屍黨 嘅成員會去到大街，同 殭屍詭姬 一齊，準備好最後嘅對戰策略；至於 狼人族 嘅成員，就會跟隨 狼人戰臣 去到森林入面緞練，將自己身體嘅力量提升到最高！經過咗十個月圓之夜，兩大魔黨嘅成員用自己嘅方式，努力為最後嘅戰爭之夜做好準備...
終於，黎到約定嘅戰爭之夜！而呢一晚，正正就係一對情侶失蹤後嘅一年；兩族成員都黎到大街... 當雙方都準備好之後，殭屍詭姬 同埋 狼人戰臣 開始對決，殭屍們以及狼人們亦開始互相攻擊。經過一輪對戰之後，雙方都兩敗俱傷，就只係剩低 殭屍詭姬、狼人戰臣 繼續互相進行對決... 兩大魔黨嘅領袖誓要為自己嘅魔黨爭取最後嘅勝利！究竟，黑色力量，最終會幫邊一個魔黨呢？
簡略咁同大家回顧第一至七章故事情節，但當然冇原先嗰種詭秘嘅感覺啦，都係原本個版本好啲... 如果大家想重溫返之前咁多個章節嘅原整故事版本的話，可以去返以下咁多個網址。記得趁最後呢晚為自己嘅魔黨拎多啲黑色力量啦！聽日中午12:00，將會準時發表故事嘅最終章！
自創長篇故事 -《黑色兩路》第一章 - 兩大書院的堀起
自創長篇故事 -《黑色兩路》第二章 - 悲傷的結合分離
自創長篇故事 -《黑色兩路》第三章 - 詭異的學校傳聞
自創長篇故事 -《黑色兩路》第四章 - 黑暗之夜的降臨
自創長篇故事 -《黑色兩路》第五章 - 魔黨的力量蔓延
自創長篇故事 -《黑色兩路》第六章 - 黑色力量的培增
自創長篇故事 -《黑色兩路》第七章 - 戰爭的約定之夜
兩大魔黨正在招攬黑暗大軍，收集黑色力量！立即點選心目中的魔黨，獻上黑色力量！
《黑色兩路》故事將會擁有兩個最終章結局情節，分別由狼人族和殭屍黨在決戰中勝出。誰勝誰負，將會由兩族所得之黑色力量而決定；兩族之招攬文章的瀏覽次數將會兌換成黑色力量。獲得較多黑色力量的魔黨將會勝出，而故事的最終章會於10月31日正午12:00依照相關結果發表。請為自己心目中的魔黨爭取更多黑色力量！謝謝你參與是次遊戲以及對《黑色兩路》故事的支持！
沒有留言:
張貼留言