2012年11月26日 - 演藝人員角色的開始

呢篇文章特別為2012年11月26日上午9:00留個紀念；因為響呢一刻，我正式入職成為演藝人員啦！由而家開始，我已經擔當緊 香港迪士尼樂園渡假區 演藝人員嘅呢個角色，夢想能夠實現，好感動...

朝早返到 香港迪士尼樂園渡假區，去 迪士尼大學 上堂，聽咗好多關於 迪士尼 嘅歷史同埋傳統。就算撇開演藝人員嘅身份，作為一位 迪士尼 粉絲，可以聽到咁多有用資料都係一個好難得嘅機會！今日亦獲得屬於自己嘅演藝人員名牌！以後每當我戴起名牌，我都會提醒自己要做好呢個角色！

迪士尼大學 放學後，我都入一入樂園，再次欣賞我超鍾意嘅 雪亮聖誕2012 節目 - 大街閃雪亮燈。

響樂園入面我都買咗兩樣商品黎慶祝自己正式成為一位演藝人員 ( 又用藉口黎俾自己買野... =_= )。

第一樣係 雪亮聖誕2012 米奇 毛公仔，今年套衫真係好靚，我之前已經有啲想買，今日終於買咗。以下就係毛公仔嘅招牌，又係以玻璃球造型設計嘅；而呢張相亦可以睇到件衫閃閃生輝，好靚！

之後就係 華特迪士尼2012生日徽章，我一直都好尊敬 迪士尼先生，呢枚徽章又點可以唔儲呢？

今日亦有額外收獲，分別係新一期樂園時間表，以及換上新版本嘅 迪士尼徽章 宣傳單張！諗諗下，我之後每個禮拜都要返工，每星期都拎到時間表，咁呢排就唔洗擔心會儲唔齊啦，哈哈！

聽日就係 迪士尼大學 嘅第二日，好緊張！因為聽日將會係我第一次穿著戲服，唔知感覺係點嘅呢？另外，聽日就會知道自己嘅工作地點、日子、時間，好心急想快啲知道自己會響邊間商店工作啊！我依然相信，無論之後發生咩事，Duffy 都會繼續陪住我，為我帶來歡欣、幸運！我會努力架啦！