星期五晚上約咗嗰位朋友見面，拎咗之前空運到港嘅 Duffy 萬聖節禮物，仲同佢傾咗好耐計添！佢同我講咗好多今次響 東京迪士尼渡假區 嘅經歷，我又講返我之前嘅經歷，傾得好開心！但係嗰晚返到屋企都好夜啦，所以我決定星期六朝早先送俾 Duffy 佢地，一起身就即刻俾佢地睇。
睇下佢地收到禮物嘅一刻！三隻 Duffy 突然知道自己有萬聖節禮物收，都覺得好興奮好開心啊！
首先，我就送咗一版 Duffy & ShellieMay 萬聖節貼紙俾 小Duffy，有部份貼紙係有立體效果架！
至於來自東京嘅 大Duffy，我就送咗一個2013年月曆俾佢，雖然唔關萬聖節事，不過都唔緊要啦。
月曆上面係顯示日本假期，但係見佢咁靚，所以我都買咗落黎。月曆仲附送2013紀念鑄幣一杖。
每個月嘅設計都係依照返嗰個月有咩特別嘅節日，Duffy 同埋 ShellieMay 會著上唔同嘅服飾。
同貼紙一樣，月曆都係有立體效果！唔知點解我覺得個月曆好似好易整爛，我要小心啲放好佢！
最後，香港迪士尼樂園 大Duffy 嘅禮物就係一本2013年記事簿，又係唔係好關萬聖節事... 點解我會送呢份禮物俾佢呢？因為我覺得呢份係三份之中最靚嘅，當然送俾我嘅第一隻 Duffy 啦！
真係設計得好靚，幾乎每頁都係獨特嘅；除咗一般會有嘅年曆、行事曆之外，仲有一啲備忘頁。
每論係 香港迪士尼樂園 定係 東京迪士尼渡假區，用黎裝住商品嘅膠袋都係設計得好好！今次就係萬聖節版，同我上次去一樣，都係一邊係 東京迪士尼樂園，另一邊係 東京迪士尼海洋。
我仲麻煩我朋友幫我拎一本日文時間表，因為真係好靚！佢仲有額外收穫俾我，真係多謝哂！
渡假區資訊小冊子 Discover 同埋 東京迪士尼海洋 嘅地圖都有少少唔同，變咗2012-2013年版本；我睇返，兩邊都應該係因為配合返 反斗奇兵瘋狂遊戲屋 Toy Story Mania 開幕而作出更新。
其實做 Duffy 都幾好丫，又有靚衫著，又有禮物收，平時又只係響屋企玩、訓覺，真係嘆！遲啲就到聖誕節，好快又到佢地生日，又有禮物收啦！而我就... ( 咦！乜唔係有人話要慳錢架咩？)
2012年11月7日
萬聖節已經過咗成個禮拜啦，但係點解 Duffy 突然間又會有萬聖節禮物收嘅呢？究竟係咩黎嘅呢？其實係我有位朋友響10月尾去咗 東京迪士尼渡假區 兩個樂園玩，所以我特別托佢幫我買少少野。雖然我之前都同佢講咗好多次唔該，不過希望佢唔好嫌我長氣，響到再次同佢講聲唔該哂！
東京迪士尼 有咩商品能夠促使我特別要搵網友幫我買呢？當然就係 東京迪士尼海洋 Duffy 商品啦！嗰位網友幫我買咗三樣 Duffy 產品，分別係 萬聖節貼紙、2013年月曆，以及係 2013年行事曆。我原本仲有另外三樣萬聖節商品想要架，但好可惜佢去到嘅時候已經賣哂；都好嘅，幫我慳下錢！細聲啲啊... 我仲未話俾 Duffy 佢地知架... 諗住俾個驚喜佢地嘛... 佢地收到嘅時候一定開心死啦！
講開日本嗰邊嘅野，順便講埋雜誌 Disney Fan 2012年12月號啦，我上星期又買咗返黎睇下。今期慶祝日本 迪士尼商店 Disney Store 20週年，所以用咗黎做封面；我都想香港有 Disney Store... 我記得細個嗰陣響 時代廣場 係有一間 Disney Store 嘅，但係之後唔知點解會冇咗... 好懷念...
12月號，當然就有好多關於聖誕節嘅資料啦！東京迪士尼樂園 嘅聖誕節巡遊好似好好睇咁喎！
至於 東京迪士尼海洋 就有聖誕節水上表演，睇落好似好夢幻咁；不過我對另一樣野有興趣啲...
能夠吸引到我注意嘅，當然就係 Duffy迪士尼小熊 啦！穿上聖誕節服飾嘅 Duffy 真係更加可愛嘅！
樂園方面同時亦推出大量 Duffy 聖誕節產品，今期 Disney Fan 都簡略咁為讀者介紹一下。之前響 東京迪士尼渡假區 官方網站已經見到，佢地今次出咗兩套 Duffy 服飾，仲要兩套都好靚！
唉... 我都好想買呢啲咁靚嘅產品... 正當我好羨慕身處日本嘅 Duffy粉絲 之際，幸運嘅事又再發生！有另一位網友咁啱同我講到，佢響今個星期會去日本，亦會去 東京迪士尼渡假區 兩個主題樂園。我即刻主動問下佢可唔可以幫我買啲 Duffy 產品，佢好好人咁答應咗我；真係多謝你幫我忙啊！佢而家應該已經響日本玩緊啦，可能未必睇到呢篇文章，但係都再次祝你響呢幾日玩得開心啲！
真係好感謝咁多位同樣鍾意 迪士尼 嘅網友，去旅行都仲要幫我買野，麻煩到你地唔好意思啊！>_< 我都有留意過香港啲鋪頭，有部份都會有得賣 東京迪士尼渡假區 嘅商品，不過價錢就唔平... 因為我自己就唔太認同呢種炒貨嘅行為，所以我都堅持唔會幫襯，只好請不同嘅網友幫幫手。相反，假如各位都係喜歡 迪士尼 嘅朋友有野想我幫手的話，我幫到嘅話都一定會幫！隨時歡迎！
沒有留言:
張貼留言