返工之後可能因為未習慣啦，好多時都好累... 所以上星期寫少咗文章，但今個星期會正常返架啦！返咗四日工，學咗好多新野；試過第一次落單、派貼紙、交換徽章等... 全部都係係好特別嘅體驗。下星期仲會有機會嘗試響巡遊期間幫忙維持秩序，好期待！仲可以穿上 米奇寶石背心！哈哈！
其實本身上星期二、四都想收工後入一入樂園，不過收20:00，最終都打消咗呢個念頭。最後，響星期六就入咗樂園，因為要拎時間表！嗰日唔拎就冇機會架啦！好彩嗰日收18:00咋！
入到去當然要睇我非常鍾意嘅 大街閃雪亮燈！可以見到雪橇花車已經響後台區域準備就緒！
雖然我企呢個位就睇唔清楚亮燈嘅一刻，不過最正嘅係，可以近距離影到花車上嘅 米奇 佢地嘛！
亦可以影到一眾拎住雪花燈柱嘅演藝人員；佢地嘅服飾真係好靚，睇咁多次都唔會覺得厭。
而家，美國小鎮大街 就好似變咗我嘅第二個屋企 ( 嘿嘿，又俾多咗個提示大家啦！)；今晚入到樂園，我亦特別走遍整個樂園，細看每一個主題園區，再次感受每一個園區嘅故事。
而家每次離開樂園前都會響火車站前影一張相，好似變咗個小習慣咁，不過著哂燈又真係幾靚嘅！
今期時間表係 唐老鴨 做主角，呢一晚入樂園，主要都係為咗佢咋！已經儲咗四款，要繼續努力！
今晚入園，特別興奮，最後又買咗好多野... 好彩我而家終於都有收入，就俾自己買多少少野啦！其中一樣收穫就係呢本 雪亮聖誕2012 記事簿，我再睇真啲，原來入面嘅頁面有 Duffy 架！
另外，見到好似推出咗好多新嘅 迪士尼徽章，揀下揀下，最後又買咗四個新徽章！
有我比較鍾意嘅 小飛象 同埋 Pooh；不過今次就覺得 米奇 米妮 嗰個最特別，因為有埋樂園特色。
星期日返工前都有入一入樂園，因為有任務在身啊！究竟係咩任務呢？稍後再同大家分享啦！
沒有留言:
張貼留言