Duffy迪士尼小熊 曲奇餅 驚喜登場!

昨日返工前都有花少少時間入樂園進行 Mission S2，不過更驚喜嘅係，響偶然間搵到新商品！樂園推出咗全新 Duffy迪士尼小熊 盒裝曲奇餅，好開心啊！我當然諗都唔諗就買咗一盒啦！

盒蓋上面印有好大個 Duffy 圖案，佢雙手托住個頭，好可愛！整個盒嘅形狀亦依照 Duffy 圖案設計。

盒上亦有其他 Duffy 圖案，每個嘅姿勢都唔同架！另外仲有 Duffy 腳印，以及一啲關於海洋嘅圖案。

一盒曲奇餅總共有十二塊，曲奇餅上都印有 Duffy 圖案，總共有四款；我試食咗一塊，都幾好味。

講到曲奇餅嘅味道，其實我以前都響樂園入面買過幾盒曲奇餅，通常都係牛油曲奇，味道都唔錯；但係我覺得有一款曲奇餅係特別好味嘅！就係以下呢盒 Pooh 嘅曲奇餅，因為佢係楓糖味！

言歸正傳！雖然呢盒 Duffy 曲奇餅嘅盒上印有 Disney Parks 字樣，但係我相信佢係香港獨家嘅！因為曲奇餅嘅獨立包裝上，係寫住 香港迪士尼樂園！咁就要讚下啦，因為今次個盒都設計得幾靚！

咦！繼今年年頭推出嘅 Duffy Passport 套裝，呢盒曲奇餅已經係第二樣香港獨家嘅 Duffy 商品！無論與美國方面同步發售又好，抑或自家製獨家發售都好，希望未來可以見到更多 Duffy 商品啦！