DIY個人化 - 雪亮聖誕徽章 X 黑色世界搖搖

奇妙處處通 會員獨家專享嘅聖誕徽章套裝，其中嘅巨型聖誕樹徽章，容許購買後使用個人化服務；不過我最後就冇選擇到使用個人化服務，返到屋企就自己DIY，寫咗啲字句響個聖誕樹徽章上面。

另外，響 迪士尼黑色世界2012 玩遊戲獲得嘅搖搖，我之前就話想亦自己加圖片上去；前幾日有時間，終於加咗 黑色世界 嘅圖片上去啦！一邊係殭屍黨，另一邊就係狼人族！

因為我覺得原本嗰個招牌唔夠靚，所以先至貼圖片上去；但係列印出黎嘅圖片好似大咗啲，哈哈！

講開個人化服務，先前就提及過我而家其中一樣工作就係落單，其實就係同個人化服飾有關嘅；因為我間商店就有提供個人化服務，所以我響工作期間有時會幫賓客落單，寫清楚佢地有咩要求。( 話埋俾大家知道有個人化服務，連同之前嘅提示，基本上已經開估咗我究竟響邊間商店，嘿嘿！)

個人化服務係由專業演藝人員為賓客響商品上寫上字句或畫上圖案，為賓客留下難忘嘅回憶。同我呢啲求其響徽章上面畫上去嘅字句相比，個人化服務當然就靚好多啦！同時亦唔易甩色！大家有冇興趣擁有個人化嘅商品嗎？而家 雪亮聖誕 嘅聖誕掛飾好受歡迎，都係一個唔錯嘅選擇！