上星期六好興奮咁買咗好多野，其實仲有一樣未分享，就係 奇妙處處通 會員專享聖誕徽章套裝！原本都仲諗緊買唔買，覺得佢要二百幾蚊有啲貴，但見到實物幾靚，所以最後就買咗啦！
呢盒徽章套裝嘅背面除咗印有 迪士尼徽章 標誌之外，仲有代表 奇妙處處通 會員專享嘅圖案；另外，同其他限量版徽章一樣，都有註明呢套係限量版，限量300套，令呢套徽章更顯珍貴！
呢盒套裝包含四款徽章，每一個都設計得好靚；我重新擺放過四個徽章，覺得咁樣放會好睇啲；因為咁樣就唔會遮擋住背景嘅 睡公主城堡，今次嘅背景圖片都設計得幾靚，值得一讚啊！其中三個徽章同一般徽章嘅尺寸差唔多，上面分別有 米奇、米妮、鋼牙奇奇 同埋 大鼻帝帝；至於最後嘅巨型聖誕樹徽章，購買套裝之後更加可以選擇使用個人化服務響徽章上面寫上字句。
每一個徽章嘅背後都會刻有 迪士尼徽章 標誌、奇妙處處通 會員專享圖示，以及限量300個嘅字眼。唔知呢套咁精美嘅徽章套裝又吸引到你嗎？有興趣嘅會員記住要趁早買啦，始終都係限量發售嘛！
2012年11月17日
上星期四11月15日除咗係 雪亮聖誕2012 嘅開始之外，同時亦係會員獨家 Vinylamtion 嘅推出日；當日入到樂園之後就去搵呢個 Vinylamtion 模型，雖然見到實物好似冇咁靚，不過我最後都買咗。
同之前會員專頁所提及嘅資料一樣，呢個模型嘅底部印有 奇妙處處通 以及 限量300個 嘅字樣。
以下就係呢個 Vinylmation 嘅包裝盒，就連包裝盒上面都印有 奇妙處處通 嘅英文字樣架！
買完呢個模型，我而家仲考慮緊之後買唔買埋會員獨家徽章套裝好... 因為真係唔想用咁多錢... 但係，雖然我成日都話要慳錢，我依然經常俾樂園入面嘅商品吸引到，嗰日都買咗好幾樣野...
儘管好似用咗好多錢買野，事實上，我每買一樣野之前，背後都要有一個原因先至會買返屋企；其實有時候啲理由都幾無聊，咪又係自己俾藉口自己買野... 買下買下就變咗好幾樣... 不過，因為呢篇文章係講獨家 Vinylmation、迪士尼徽章，所以其他商品我就留待稍後再分享啦！
2012年11月11日
奇妙處處通 會員們前兩日都應該收到樂園發出嘅會員專訊，有好多關於 雪亮聖誕2012 嘅資料！不過今年啲表演同上年一樣，冇咩特別，惟有希望今年響商品上同埋其他方面會有驚喜啦... 而今次嘅會員專訊就率先為我地一班Fans帶來一個好消息，就係樂園推出會員專享獨家商品！
樂園首次為 奇妢處處通 會員推出兩款限量商品，分別係 迪士尼徽章套裝 以及 Vinylmation模型。兩樣商品都係限量300件，產品上印有 奇妙處處通 標誌或字樣。睇張相片就覺得兩款都唔錯喎！特別係個 Vinylmation 模型，就連平時對 Vinylmation 冇咩興趣嘅我都覺得幾靚，心郁郁想買添！至於徽章套裝就有四個徽章，其中一個係巨型聖誕樹徽章，巨型徽章更加可以印上個人化字樣。
其實就算呢兩樣產品設計得冇咁靚嘅話，我都會俾「奇妙處處通 獨家」呢個噱頭搞到我想買！唔係因為突然覺得自己變咗一位「尊貴的會員」，而係我覺得呢個機會好難得，要好好把握。前排先講過，我覺得樂園好似一直都唔太注重一班Fans，估唔到咁快佢又推出今次嘅獨家商品。基本上佢係唔需要將呢兩款商品變成會員獨家商品，佢照舊正常咁推出嘅話都總會有Fans買；我諗園方終於都開始積極關注下佢嘅Fans，係個好開始，期待未來可以見到更多同會員相關嘅事！
沒有留言:
張貼留言