一踏入 反斗奇兵大本營，就可以見到 安仔玩具箱！龐大嘅 沖天搖控車 就做咗呢個畫面嘅背景。
現場出現「安仔玩具箱 將於二月中旬開幕」嘅告示，應該過多大約兩個禮拜之後就可以入去！睇黎，總設計師兼總工程師 安仔，而家正在為自己嘅玩具箱開幕作最後準備！好期待啊！
安仔 亦特別響玩具箱嘅多個位置寫上「Andy's Toy Box」，話俾人知呢個就係屬於佢嘅玩具箱！
當你進入園區，化身成細小嘅玩具嗰陣，周圍所有野都會變得非常巨大！呢個紙皮箱都唔例外！所以野都咁巨型嘅時候，每個部份都可以睇得好清楚，就連紙皮箱嘅瓦通紙質地都清晰可見。
叫得做玩具箱，點可以冇玩具呢？響店外有兩個 綠色小人，以及化身工程監督嘅 薯蛋頭先生。
見到 薯蛋頭先生 背面呢個可以將身體配件放入去嘅開口，即時諗起佢用緊怒火眼睛嘅樣！哈！
工程監督 薯蛋頭先生，拎住咗設計藍圖，確保玩具箱能夠準確地依照 安仔 嘅設計而建成。可以見到藍圖上所顯示嘅就係玩具箱入口，並有明確註明各種物件，例如間尺就寫住「Ruler」。
設計師真係有好多玩具，佢將其他玩具嘅樣貌畫咗響玩具箱上面，火腿 係當中比較著目嘅一個；其餘三個就係 寶貝、吱吱、Rocky，都係 反斗奇兵 頭兩集電影入面嘅經典玩具角色。
安仔 響玩具箱嘅其中兩邊畫咗大門，之後就剪開紙皮箱，俾我地呢班玩具可以入去裡面！
整個玩具箱嘅圖案都係用蠟筆畫出黎嘅，畫得好靚，響附近亦可以見到幾支不同顏色嘅蠟筆。
玩具箱外面仲有由積木改製而成嘅櫥窗，相信係用黎展示商品，上面都有 安仔玩具箱 嘅字樣。
尋日花咗少少時間去睇真啲玩具箱嘅外觀，俾我發現咗一個整得好有心思嘅特別效果！原來 安仔 擔心鉛筆、間尺會俾風吹跌，所以就插咗入泥土入面，響現實中都呈現出呢個效果。
安仔玩具箱 動工之前，呢個位置原本有一架紙飛機玩具響到；完工後，呢架飛機亦都再次出現！我本身仲以為起好咗玩具箱之後都唔會有得見返呢架飛機，估唔到佢地又放返玩具箱旁邊！
最後，就等我地回顧返 安仔玩具箱 嘅整個興建過程啦！開幕嘅時候，呢個位置就只係一堆草...
2012年7月，突然出現藍色圍板！之後，圍板上更加出現好多圖案，預告將會興建 安仔玩具箱！
工程全速進行！響幾個月之間，由一塊空地，變成一棟建築物，再慢慢為外牆進行粉飾工作！
2013年1月，安仔玩具箱 終於響我地眼前展現出真面目！並宣佈商店將會於2月中旬開幕！
整個興建過程只係用咗大約半年，真係好強！反斗奇兵大本營 咁快就有新商店落成，值得慶賀！而家真係好想快啲睇下裡面嘅佈置，亦希望玩具箱入面將會發售更多種類嘅 反斗奇兵 商品啦！
沒有留言:
張貼留言