樂園事物仔細尋 - 印刷於樂園指南的名牌

樂園事物仔細尋 呢個系列又再同大家見面啦！今次呢個發現仲要唔洗入樂園玩都可以搵到！各位不時都會入樂園玩嘅 奇妙處處通 會員，相信都已經對園內各種設施嘅位置、佈局瞭如指掌；或者都已經唔再需要再拎樂園指南，又或者只係用作收藏，但其實每款指南都有啲得意野架！

講起得意野，有朋友同我講過，每款樂園指南嘅封面都會有一個 隱形米奇，有啲仲幾難搵添！不過，我今次唔係想講 隱形米奇，今次我將焦點放咗響印刷於樂園指南內嘅演藝人員名牌。

樂園指南內印有名牌，係想提醒返賓客，假如響有任何需要、疑問，都可以搵演藝人員幫手。點解我會突然講起呢個名牌呢？係同最新一期樂園指南有關！因為我見到一個從未見過嘅名字...

響呢本樂園指南裡面，名牌上所顯示嘅名字，Arthur，係一個我響咁多款指南內都未見過嘅；於是我就諗，究竟呢個名字有咩玄機呢？有咩原因去促使園方將呢個名放響樂園指南入面？

諗諗下，我又覺得好似響邊到聽過呢個名... 丫！我醒起啦！係2013-2014年度親善大使，Arthur！相信園方係特別響2013年第一本樂園指南用咗親善大使嘅名字去代表全體演藝人員，好有意義！

發現呢個咁特別嘅安排後，我又睇返以前嘅樂園指南；原來園方不時都會用啲有特別含意嘅名！例如，響2008年、2009年 黑色世界 活動期間所派發嘅樂園指南，就用咗 南瓜王Jack 嘅名字！

當 反斗奇兵大本營 開幕，當時嘅樂園指南就用咗 Woody！( 仲係五週年版本嘅名牌添！)

假如你有儲開樂園指南的話，不妨睇睇近呢幾年嘅各款樂園指南，留意一下指南內嘅名牌；你應該會發現，出現得最多嘅，係一個A字頭嘅名字；我第一時間就只係諗到一個原因，哈！有時候，睇真啲各款樂園印刷品，可能都會有啲得意嘅小發現架！你都一齊發掘一下丫！