有睇開 Tho's Dreams 嘅朋友應該知道，小飛俠 Peter Pan 係其中一位我好鍾意嘅 迪士尼朋友。但係你又知唔知，《小飛俠》呢齣 迪士尼 嘅經典動畫電影，係響邊一年響戲院上映嘅呢？原來，《小飛俠》係響1953年2月5日上映嘅！亦即係，小飛俠 轉眼間已經「飛」咗六十年啦！
其實我原本都唔知道架，但係前排行行下街，終於俾我搵到想買好耐嘅《小飛俠》電影DVD！朋友前排同我講過，而家 迪士尼 通常都係當動畫電影去到某個週年先會重新發行特別版DVD；我見到買返黎嗰隻寫住「閃鑽珍藏版」，於是就上網睇資料，終於發現原來係六十週年！
《小飛俠》作為 迪士尼 經典動畫，電影入面嘅 小飛俠、奇妙仙子 亦已經成為經典 迪士尼朋友。但係響 香港迪士尼樂園 入面就好似比較少見到 小飛俠 嘅蹤影喎... 只係響 米奇幻想曲 客串一下... 相反，響2011年，自從樂園五週年活動 飛躍奇妙 開始之後，奇妙仙子 就成日響園內現身！
究竟園方幾時先肯俾 小飛俠 響樂園入面多啲出現呢？如果可以推出 小飛俠 嘅相關商品就好啦！呢一刻請容許我再度重提 Duffy迪士尼小熊 小飛俠造型套裝，究竟幾時先有得賣！我好想要！>_<
除咗商品之外，其實響其他 迪士尼樂園，小飛俠 係會出黎同大家見面、影相，好得意架！
以下呢段片係一位Fans拍嘅，係佢送一幅畫俾 小飛俠 嘅經過，小飛俠 仲叫佢響幅畫上面簽名添！
講到其他 迪士尼樂園，當然唔可以唔講經典遊樂設施，小飛俠天空之旅 Peter Pan's Flight！
位於世界各地嘅 迪士尼樂園，園內嘅 幻想世界 都有呢個遊樂設施架！( 香港迪士尼樂園 除外 ) 我上年去東京嗰陣都有玩 東京迪士尼樂園 版本！真係好好玩！不過算啦... 我都唔奢望香港會有...
響過去嘅六十年，充滿童真嘅 小飛俠 成日都會帶領我地暢遊天際，響天空中自由自在地飛翔！而家，奇妙仙子 經已響 香港迪士尼樂園 散播奇妙閃粉，唔知 小飛俠 又會幾時先飛到黎香港呢？
沒有留言:
張貼留言