重新尋回錯失了的幸福歡樂 - Duffy篇!

正當我同 Duffy 響園內玩緊嘅時候，我經已預先準備好一篇關於 Duffy迪士尼小熊 嘅文章！呢篇亦都係最後一篇 東京迪士尼之旅2013「重新尋回錯失了的幸福歡樂」嘅相關文章！

我曾經將 東京迪士尼海洋 稱為「Duffy 聖地」，然而，上年到訪呢個樂園嗰陣只得半日時間...  唔夠時間，惟有匆忙地遊覽樂園，作為 Duffy 粉絲嘅我，只好無奈地放棄部份同 Duffy 有關嘅項目...  同時，雖然帶咗兩隻 Duffy 小熊同我去玩，但係響渡假區內兩大主題樂園都冇咩同佢地影相... 

唔知大家記唔記得，我上年返到黎，分享咗一件響 東京迪士尼海洋 裡面發生嘅搞笑事件！遊覽樂園之前，上網見到園內會有多個 Duffy 拍照景點，我原本以為係一啲特別嘅佈置可以影相。

遊覽當日我猛咁去搵呢啲拍照景點，不過搵極都搵唔到！只係搵到一塊木板表示係拍照景點！嗰一刻我以為即係叫我一隻手拎 Duffy，另一隻手拎相機，用漂亮嘅景色做背景，響到影返張相！吓...  好唔方便喎...  所以我放棄咗...  返到香港，我先知道原來塊板係可以拉落黎俾 Duffy 坐上去！

我好蠢啊！其實係一個好貼心嘅設計！咁樣就錯過咗！今次再去，我要幫 Duffy 熊仔影多啲相！而之前都有提及，今年 米奇和Duffy的春日巡航 活動升級登場，當中就新增咗更多春日拍照景點！同樣有位置俾 Duffy 坐低影相，我一定唔可以再錯過！所以大家記住幫我選擇帶邊隻小熊去啦！;)

Duffy 話哂都係春日巡航活動嘅主角，當然仲有更多同佢有關嘅項目，就係三個不同嘅節日表演！春臨里多島 Lido Isle Welcome to Spring 表演，四位 迪士尼朋友 會乘搭渡輪出場，再上岸跳舞；但上次因為太大風，佢地最後冇上到岸，期待今次再度到訪嗰陣可以睇到一次完整嘅演出！

另一個上年睇過嘅表演，叫做 驚喜迎春 Springtime Surprise，不過覺得有啲悶，睇咗一半就走咗。前嗰排睇咗幾張日本 迪士尼 粉絲影嘅相，見到今年響表演中加入咗一個特別環節，令我興趣大增！究竟呢個新環節係咪真係咁有吸引力，能夠令我睇哂整個表演呢？好！我就拭目以待！

第三個表演，紐約復活節 Easter in New York，上年選擇唔睇，但其實佢先至係最正嘅一個表演！事關佢係三個節日表演之中最多 迪士尼朋友 出場嘅！唉... 我上年又做咗錯誤嘅決定，錯失良機...  而今年亦特別安排響傍晚上演其中一場 紐約復活節，又係一個賣點！我絕對唔可以再做錯誤決定！

但講到我上年覺得最遺憾嘅，就係無同 Duffy 影相！我一見到要等45分鐘，就即刻轉身走人！45分鐘？其實都唔算好耐啫！但係響時間咁緊迫嘅情況下，我梗係寧願玩多一個遊樂設施啦！好彩今次有大把時間，排幾耐都好，我都要同 Duffy 影相！就等我去 漁村迎賓小屋 尋找 Duffy！

能夠再次去到 東京迪士尼海洋「朝聖」，我要把握每個機會，好好享受每個 Duffy 相關嘅項目！再次邀請大家幫我決定帶邊隻 Duffy 去，5月7日就會截止啦！獲採用提議的話會有一份小禮物架！