重新尋回錯失了的幸福歡樂 - 表演篇!

今晚繼續有 東京迪士尼之旅2013「重新尋回錯失了的幸福歡樂」嘅相關文章！上年除咗唔夠時間玩之外，其實都唔係咁好彩，遊覽 東京迪士尼樂園 嘅嗰一日咁啱遇著下雨天...  時間緊迫再加上天氣問題，令我錯過咗好多精彩嘅表演，所以我今年嘅另一個願望就係要睇返哂！

不如先講下 東京迪士尼海洋 嘅娛樂表演啦！園內廣闊嘅「海洋」，同時亦係一個表演舞台！每一日都會有不同嘅表演都會響海面上演，當中我最感興趣嘅，就係夜間表演 Fantasmic！魔法師米奇 施展魔法，配合燈光、水舞、煙火效果，場面非常壯觀！呢次到訪必定要欣賞一下！

至於響日間，海上又會有另一個截然不同嘅表演，東京迪士尼海洋 嘅獨有代表作，海上巡遊！密西哥傳奇 The Legend of Mythica 由2006年開始上演，可愛之中亦帶有一點古典色彩。上次因為掛住去玩遊樂設施，所以放棄咗呢個表演冇去睇，今次唔可以再俾呢個情況發生！

過去呢一年，先後有不同嘅朋友去完 東京迪士尼渡假區，佢地返到黎都有同我分享一啲趣事！其中一位就同我講到，動感大樂團 Big Band Beat 呢個表演入面，米奇 會非常激動地打鼓！米奇 會響表演中打鼓？相信感覺一定會好新穎！既然有朋友推介，咁我到時又去睇下啦！

另外亦有一位朋友向我推介 神秘節奏 Mystic Rhythms，一個以大自然做背景故事嘅表演。返回以前未被開發嘅森林，靜聽精靈嘅聲音，進入夢幻嘅場景...  應該都會係一個非常出色嘅表演！

好啦，又返到去另一邊嘅 東京迪士尼樂園！出一次我覺得最可惜嘅，就係冇得睇夜間巡遊！因為天雨關係，夜間巡遊 夢之光 Dreamlights 取消上演，取而代之嘅係小型巡遊 夜幕彩輝。我本身最期待就係夜間巡遊嘛！冇得睇梗係好唔甘心！今年有機會再去睇，千祈唔好落雨啊！>_<

響官方網站再搵一搵，發現原來仲有一個好有意義嘅舞台劇，一個人的夢想 One Man's Dream！講緊嘅，當然就係 華特迪士尼先生 啦！劇中會出現多套 迪士尼 經典動畫，向 迪士尼先生 致敬！嘩！圖中有好多 迪士尼朋友 喎！陣容非常強大！可以一次過見到咁多 迪士尼朋友，值得一看！

上年忽略咗咁多表演，再加上三十週年慶典壓軸嘅 幸福在這裡 日間巡遊，今次必然會目不暇給！睇咗部份相片，感覺上比起先前嘅 Jubilation 歡騰 巡遊表演更加有吸引力！好想快啲去睇啊！

唔少得嘅仲有三十週年特別煙火表演 幸福滿夜空！係入夜後另一個重點娛樂項目！雖然上年睇過 東京迪士尼渡假區 嘅煙火表演，覺得比起 香港迪士尼樂園 嘅煙火冇咁好睇...  但話哂人地都係三十週年，唔知響 幸福歡樂年 期間，煙火表演又會唔會有特別驚喜呢？

舞台劇、日間巡遊、海上巡遊、夜間巡遊、煙火表演，總共有四日時間俾我慢慢欣賞每項節目！但其實我又有啲擔心會唔會睇唔哂...  因為我仲有最後一樣好重要嘅野要補償返！聽日繼續分享！