呢幾日突然間又好似冇咩好寫咁... 既然係咁，不如繼續講下我非常期待嘅 東京迪士尼之旅2013！上年因為種種原因 ( 最主要係因為唔夠時間 )，響 東京迪士尼渡假區 裡面都錯過咗唔少精彩嘅野。再有機會去到兩大主題樂園玩，時間亦比起上年充裕得多，我當然唔可以俾自己再錯過咁多野！
詳細研究過渡假區官方網站，發現原來我真係有好多野都忽略咗，而其中一樣就係：園內美食！回想起上一年，當時我自己一個人響 東京迪士尼樂園，只係求其搵啲野落肚，食少少就繼續去玩... 但咁樣係大錯特錯架！因為園內其實有多款美食，非常吸引！一場黎到，梗係要趁機品嚐一下！
近期就見到樂園裡面有一間提供自助餐嘅餐廳，有好多款式嘅食物，部份嘅造型更加係得意搞鬼！有 米奇造型炸雞、跳跳虎尾巴包點、妙妙貓造型甜點，仲有印有三十週年標誌嘅意式蛋糕！更重要嘅係，收費一啲都唔貴，每位成人只需3000日圓，即係大約235港幣，值得考慮一下！
享用自助餐嘅話，亦可以另加1000日圓 ( 大約78港幣 )，換購三十週年珍藏版金色匙羹。呢隻匙羹睇落都設計得幾細緻，印有華麗嘅花紋、三十週年標誌，都係一件唔錯嘅紀念品！
有一樣野一定要提及，就係 東京迪士尼渡假區 好鍾意將紀念杯、紀念碟連同甜點一齊發售。呢啲紀念餐具係冇得單買嘅，所以想將佢地帶返屋企就必須先要品嚐布甸、蛋糕等甜點。好彩，呢啲甜點嘅賣相都唔錯，而我自己本身亦係一個鍾意食甜點嘅人，所以冇問題，哈哈！
睇完三十週年嘅特色食品之後，又等我地轉去睇下隔離 東京迪士尼海洋 米奇和Duffy的春日巡航！上年體驗過呢個活動，都有試過一啲相關嘅特色食品，不過我今次響官方網站又有新發現！就係一個整到好似水泡嘅包點！我一定要食，因為嗰張包裝紙好靚！( 竟然係為咗張包裝紙 -_- )
上次食過一個套餐，今年都有繼續推出，同樣可以加錢換購一個 Duffy 餐盤，今年仲要靚過上年！請唔好睇死我淨係為咗個餐盤而食呢個餐，我覺得呢個套餐本身都幾吸引架！( 好似有啲假 XD )
另一樣上年曾經品嚐過嘅，就係 Duffy造型蛋糕，會附送一個紀念碟，今年都繼續會有。除此之外，仲有布甸會附送紀念杯，上年因為覺得個杯唔靚，所以冇食，但今次可以再諗諗！
兩大主題活動連帶推出多款特色食品，事實上，就算平時冇活動，樂園裡面都有好多有趣嘅小食！我睇中咗其中一樣小食，就係 綠色小人糯米糍！三隻三眼仔，分別係三種味道，到時一定要試！
雖然以上咁多樣食品睇落都好吸引，但係我最期待嘅，反而係一種好似平平無奇嘅食品... 爆谷！園內原來有好多不同味道嘅爆谷，有士多啤梨味、蜜糖味... 我上年竟然一款都冇試過，搞錯！
同埋佢地嘅爆谷桶亦都設計得好靚，響當地係大受歡迎架！甚至連外國嘅 迪士尼 粉絲都讚不絕口！春日巡航版 會附送一個迷你版俾 Duffy 戴住，三十週年紀念版 就可以由三層變做一層，方便收藏。嘩！啲爆谷桶咁有創意，我當然要支持啦！睇黎我都要入鄉隨俗啦！( 又俾藉口自己買野... 嘿嘿！)
估唔到上年真係有好多野冇發掘到！好彩今年再有機會去，補返數！我唔會再俾自己錯過任何野！之後會有更多關於「重新尋回錯失了的幸福歡樂」嘅文章登場！大家都可以估下有咩架！:)
沒有留言:
張貼留言