上次無無聊聊走咗去酒店，點知無意中又有新發現！迷離莊園 主題穿梭巴士現已率先登場！車身上面可以見到 亨利爵士、阿拔，以及莊園裡面嘅建築物；而車尾就有 奇幻庭園 嘅藝術品！睇黎，整個 香港迪士尼樂園渡假區 已經為新園區開幕做好準備！唔知你又做好心理準備未呢？:)
2013年4月21日
距離 迷離莊園 嘅開幕日子愈黎愈近，園內大部份指示相信都已經逐步完成！而今日入樂園玩嘅時候，周圍行下，又再次見到有更多 迷離莊園 嘅相關佈置、指示出現！
灰熊山谷、反斗奇兵大本營 入口火車橋上面先前裝上金色招牌，今次就有 迷離莊園 招牌 登場！
兩個入口都一次過顯示咗三個新園區嘅招牌，話俾賓客知道，呢條通道可以通往呢三個園區。
不過，由於 迷離莊園 仲未開幕，通道都並未完全開放，所以火車橋下面都放有指示牌提醒賓客。
除此之外，上次提及到嘅 迷離莊園 大門「MP」標誌，今次亦都已經響 反斗奇兵大本營 呢邊出現！
睇黎指示真係已經搞掂哂，可能去到開幕先會再有新進展，唔知呢個月內會唔會有特別發現呢？咦！灰熊山谷 開幕前，園方試過響樂園指南以半透明形式顯示新園區，今次會有同樣做法嗎？
2013年4月16日
四月已經過去咗一半，離 迷離莊園 開幕再近一步，又係時候睇下呢個新園區嘅最新狀況！前排曾經見過園區內經已移走工程設備，但係之後就出現返；今次，工程設備再次消失咗！
響 灰熊山谷 一端嘅園區入口，除咗之前嘅招牌之外，大門上面亦已經裝上園區嘅「MP」標誌！
今次入樂園玩，響 灰熊山谷 入口嘅火車橋見到一樣得意野喎！中間出現咗一個金色嘅物件！
原來係 灰熊山谷 招牌！呢個金色嘅招牌，有灰熊圖案，亦有園區嘅中英文名稱。
去到 反斗奇兵大本營 呢邊嘅入口火車橋，亦都出現咗一個擁有相同風格嘅金色園區招牌！
其實我自己一開頭就覺得呢個招牌有啲不倫不類，而家睇睇下，又覺得唔算太差。不過，我依然有一個疑問：兩邊入口原本都已經有指示牌，呢個金色招牌係唔係真係有需要...？
2013年4月3日
繼續更新 迷離莊園 最新狀況！踏入四月，總係覺得好似離開幕又再近咗好多！上次入去嗰陣冇拎長鏡頭，影唔到好遠嘅野，有啲相係返黎之後放大嘅，可能有啲朦，請見諒！
響 反斗奇兵大本營 呢邊嘅入口望入去，可以見到 迷離莊園 嘅指示牌！上面更加有「MP」標誌！
而返到去 灰熊山谷 嗰邊，就發現 迷離大宅 入口出現咗兩尊石膏像！唔知點解我覺得有啲詭異...
前嗰排坐過火車，都見到園區內好多有趣嘅佈置，不過就冇影相，我今次就專登坐下火車影下相！迷離莊園貨運火車站 附近，擺放咗幾舊大型石板，應該係古埃及石板黎嘅，唔知有咩特別之處呢？
同場加映：上星期三樂園加價後，迎樂路 兩旁嘅招牌 亦被換上 奇妙處處通 全新宣傳圖片！今次嘅圖片再次以園內各個主題園區做主題，而值得注意嘅係，迷離大宅 亦有出現於圖片中！
2013年3月27日
仲有個幾月，萬眾期待嘅全新主題園區，迷離莊園，就會隆重開幕啦！相信大家都非常興奮！由當初公佈擴建計劃至今，話咁快就已經過咗接近四年！終於，我地好快就可以入去一探究竟！
迷離莊園 係三個擴建園區之中，我最期待嘅一個，因為我一直都俾佢神秘嘅故事吸引住... 由今日起去到試玩之前，我會集中響呢篇文章更新莊園嘅最新情況！同大家一齊作最後倒數！
尋日入咗樂園玩，再一次黎到 迷離莊園 緊閉嘅大門前面，繼續抱住期待嘅心情遠眺 迷離大宅。但同時間，呢一日都有一個特別發現喎！莊園入口呢到，出現咗一個正式嘅 迷離莊園 招牌！
除咗寫住「迷離莊園 Mystic Point」之外，仲有「MP」標誌，以及註明莊園係響1896年成立嘅。
不過，尋日所見，灰熊山谷 呢邊嘅入口，只係裝咗一塊招牌，其餘三舊石塊就暫時未有改動。
但係響 反斗奇兵大本營 嗰邊嘅入口，大門兩旁嘅石塊都經已換上 迷離莊園 招牌！好快手呢！
究竟會響五月邊一日開幕呢？園方咁耐都未公佈確實日期，真係搞到我好緊張、好心急啊！
今日都研究咗一陣，我嘅心目中已經有一個估算出黎嘅開幕日子！大家都可以估下幾時開幕架！
沒有留言:
張貼留言